ALT University базасында креативті және цифрлық технологияға арналған ACT Creative Tech Week 2026 халықаралық апталығы ашылды. Қазақстанда алғаш рет ұйымдастырылған іс-шара жасанды интеллект, креативті индустрия, цифрлық контент пен инновациялық өндіріс бағыттарын біріктіреді.
Ашылу рәсіміне Almaty Tourism Bureau өкілдері, шетелдік білім беру және технологиялық ұйымдардың делегациялары, сондай-ақ жасанды интеллект пен креативті индустрия саласының сарапшылары қатысты.
Алматыдағы Корея Республикасының Бас консулы Ха Тэ Ук кореялық мамандар қазақстандық жастармен жасанды интеллект, ақылды өндіріс, No-Code технологиясы және цифрлық контент саласындағы тәжірибесін бөлісетінін айтты.
«Бұл бағдарлама адами капиталды дамытуға және екі ел арасындағы әріптестікті нығайтуға ықпал етеді деп сенемін», – деді ол.
ALT University директорлар кеңесінің төрағасы Арслан Серіктегі халықаралық апта аясында Оңтүстік Кореяның бірқатар ұйыммен ынтымақтастық туралы меморандумдарға қол қою жоспарланғанын мәлімдеді.
Оның айтуынша, бұл келісім бірлескен білім беру бағдарламаларын дамытуға, ғылыми зерттеулер жүргізуге, академиялық алмасуды кеңейтуге және озық технология енгізуге мүмкіндік береді.
ACT Creative Tech Week бағдарламасы төрт негізгі бағытты қамтиды: визуалды сторителлинг пен вебтун жасау, кино, анимация және жарнама саласында жасанды интеллектіні қолдану, өндірісті цифрландыру және бағдарламалау дағдысын қажет етпейтін қосымшаларды әзірлеу.
Қатысушылар халықаралық креативті және технологиялық индустрияда кеңінен қолданылып жүрген практикалық құралдармен және озық тәжірибелермен танысып отыр.
Academy of Creative Technologies – ALT University жанынан құрылған халықаралық білім беру платформасы. Ол жасанды интеллект, IT және креативті индустрияның тоғысындағы жаңа буын мамандарын даярлауға бағытталған.