Алматыда әлемге әйгілі Cirque du Soleil ұжымының OVO шоуының премьерасы өтті, – деп хабарлайды aqshamnews.kz тілшісі.
Халықаралық команда алғаш рет бұқаралық ақпарат құралдарының өкілдеріне қойылымның сахна сыртындағы өмірін таныстырып, әртістердің дайындығы мен техникалық топтың жұмысын көрсетті.
Баспасөз турына қатысқан журналистер қойылымның қалай әзірленетінін көріп, әртістер мен ұйымдастырушылармен сұхбаттасты.
Cirque du Soleil-дің ресми өкілі Жани Малленің айтуынша, OVO - акробатика, жанды музыка, ерекше костюмдер мен әсерлі сахналық образдарды біріктіретін ауқымды шоу.
- OVO - Cirque du Soleil-дің ерекше қойылымдарының бірі. Мұнда әлемнің үздік акробаттары өнер көрсетеді. Шоу тақырыбы жәндіктер әлеміне арналған. 53 әртіс көбелектерді, шегірткелерді, қоңыздарды және басқа да жәндіктерді бейнелейді. Португал тілінен аударғанда ovo «жұмыртқа» дегенді білдіреді және қойылымның негізгі оқиғасы осы жұмбақ жұмыртқаның айналасында өрбиді, – деді Жани Малле.
Шоу алғаш рет 17 жыл бұрын сахналанған. Осы уақыт ішінде оны әлемнің 50-ге жуық елінде 10 миллионнан астам көрермен тамашалаған. Қазақстан OVO гастрольдік сапарлары өткен 47-ел атанды.
Қойылым жәндіктердің қиял-ғажайып әлеміндегі махаббат хикаясын баяндайды. Сахнада көбелектер, құмырсқалар, өрмекшілер, қоңыздар мен басқа да кейіпкерлер жан біткендей әсер қалдырады. Акробатика, театр, музыка, би және визуалды өнердің үйлесімі көрермендерді ерекше әлемге жетелейді.
Шоуда бірнеше бірегей акробатикалық нөмір ұсынылады. Солардың бірі - алып тербелмелі жапырақ үстінде бос тартылған сыммен орындалатын күрделі қойылым. Сондай-ақ қараңғыда ультракүлгін жарықтың көмегімен көрсетілетін diabolo жонглерлік нөмірі, әуедегі «көбелектер» дуэті, батут қабырғасындағы акробаттар мен әуе гимнастарының өнері көрермендерді таңғалдырады.
Қойылымды жүзеге асыруға әлемнің 25 елінен келген 100-ден астам маман қатысады. Шоуда 53 әртіс өнер көрсетсе, музыкалық сүйемелдеуді жанды дауыста орындайтын музыканттар қамтамасыз етеді.
OVO шоуының тағы бір ерекшелігі - оның костюмдері мен декорациялары. Бір қойылымда шамамен 800 костюм элементі пайдаланылады. Олардың күтіміне гастроль кезінде бес гардероб маманы жауапты. Барлық костюмдер Cirque du Soleil-дің Монреальдағы штаб-пәтерінде әр әртіске арнайы тігіледі.
Сахна сыртындағы экскурсия барысында журналистер әртістермен де тілдесті. «Көбелек» рөлінде өнер көрсететін әуе гимнасы Артур Дудов Қазақстанның оның гастрольдік сапарлар картасындағы жаңа ел екенін айтты.
– Біздің нөмірлерді орындау үшін ұзақ жылдар бойы жаттығып, әр қимылды жетік меңгеру қажет. Сахнада көрермендер бірнеше минуттық өнерді тамашалағанымен, оның артында үлкен команданың тынымсыз еңбегі жатыр. Сондықтан әр қойылым жан-жақты дайындалып, барлық жұмыс үйлесімді ұйымдастырылады, - деді Артур Дудов.
Қазіргі уақытта OVO шоуының көрсетілімдері Алматыдағы Almaty Arena аренасында жалғасып жатыр.