Алматыдағы «Алатау» дәстүрлі өнер театры алғаш рет күрделі жөндеуден өтуде.
Ғимарат ашылғалы бері мұндай ауқымды жаңарту қолға алынған емес. Жөндеу жұмыстары қасбетті, кинозалды, еден жабыны мен орындықтарды, сондай-ақ ғимарат айналасын қамтиды, деп хабарлайды aqshamnews.kz.
Ерекше назар аз қозғала алатын азаматтарға қолайлы жағдай жасауға бөлінген. Жүргізіліп жатқан жұмыстар көрерменге де, шығармашылық ұжымға да барынша жайлы орта қалыптастыруға бағытталған. Маңыздысы – театрдың заманауи әрі қолайлы болуы.
Нысанды Алматы мәслихатының депутаттары барып көрді. Делегацияға мәдениет, спорт, ішкі саясат, дін және жастар ісі жөніндегі комиссия төрайымы Диана Ерлан жетекшілік етті. Депутаттар қаладағы театр ұжымдарының республикалық және халықаралық деңгейде жетістіктерге жетіп жүргенін атап өтті. Сондай-ақ олар «Алатау» театрының 10 жылдық мерейтойын жаңарған, заманауи келбетімен қарсы алуы қажеттігін ерекше айтты.
Күрделі жөндеуді осы жылдың соңына дейін аяқтау жоспарланған.