Алматы қаласының Өңірлік коммуникациялар қызметі алаңында Алматы қаласы Спорт басқармасының басшысы Дархан Нұрханұлының қатысуымен кеңейтілген баспасөз конференциясы болып өтті.
Оның айтуынша, 2026 жылы Алматы қаласы Спорт басқармасы спорттық инфрақұрылымды одан әрі нығайтып, спорт нысандары қала тұрғындарына қолжетімді бола түсуі үшін бар мүмкіндікті қолға алып жатыр.
Қазір «Шұғыла» мен «Авиатор» дене шынықтыру-сауықтыру кешені мемлекеттік сараптамадан сәтті өтті. Тағы екі нысан – «Шұғыла-2» мен «Қарасу» – жобалау-сметалық құжаттамасы әзірленіп, «Ақжар» мен «Саялы» ФОК-тары мемлекеттік сараптамадан өтіп жатыр. Жалпы алғанда, 6 жаңа дене шынықтыру-сауықтыру кешенін салу жоспарланып отыр.
Сонымен қатар 1935 жылы құрылған Спорттағы дарынды балаларға арналған мамандандырылған мектеп-интернат-колледжінің орнына жаңа ғимарат салу да жоспарда бар. Аталған нысанның жобалау-сметалық құжаттамасы сараптамадан өткен, құрылыс құны 5,1 млрд теңгені құрайды.
Бұдан бөлек, қалада жазғы олимпиадалық спорт түрлері бойынша толыққанды оқып-жаттығуға мүмкіндік беретін бірыңғай база жетіспейді. Осыған байланысты Абай – Розыбакиев көшесіндегі спорттық-жаттығу кешені базасында спортшыларды кешенді даярлауға арналған осы заманғы спорт орталығын құру жоспарланып отыр. Бұл орталық жаттығулар мен жарыстар өткізуге арналған үлкен хабқа айналады.
«Аталған бастаманың барлығы спортты жүйелі дамытуға, спортшылар үшін қолайлы жағдай жасап, қала тұрғындарын барынша белсенді өмір салтына тартуға бағытталған», – деп қорытындылады Дархан Нұрханұлы.
