Алматыда 50 жастан асқан өнерпаздар арасында «Алматыны аяла!» қалалық байқауы басталды

Қатысушылар үш бағыт бойынша өнер көрсетеді, деп хабарлайды aqshamnews.kz тілшісі.

Алматы қаласы әкімдігінің мәдениет басқармасы қолдауымен 50 жастан асқан әуесқой өнерпаздар арасында «Алматыны аяла!» қалалық өнер байқауы өтеді. Байқаудың басты мақсаты – аға буын өкілдерінің шығармашылық әлеуетін қолдау, өнерін насихаттау және олардың қаланың қоғамдық-мәдени өміріне белсенді араласуына мүмкіндік жасау.

Жоба аясында қатысушылар ән, күй және би өнеріндегі шеберлігін танытып қана қоймай, шығармашылық тәжірибе алмасуға мүмкіндік алады. Байқауға Алматы қаласында тұратын 50 жастан асқан әуесқой өнерпаздар мен шығармашылық ұжымдар қатыса алады.

Қатысушылар үш бағыт бойынша өнер көрсетеді:

• Ән (вокал) – эстрадалық, халықтық және академиялық вокал. Байқауға жеке орындаушылар, дуэттер, триолар және шағын шығармашылық топтар қатыса алады.

• Күй (аспаптық өнер) – жеке орындаушылар мен аспаптық ансамбльдер. Домбыра және өзге де музыкалық аспаптарда орындалатын шығармалар қабылданады.

• Би (хореография) – халық биі, қазақ биі, халықтық-стильденген және заманауи би бағыттары.

Әр қатысушы немесе шығармашылық ұжым байқауға бір өнер нөмірін ұсынады. Орындау ұзақтығы 5 минуттан аспауы тиіс. Қажет болған жағдайда сахналық уақыт техникалық мүмкіндіктерге байланысты ұйымдастырушылар тарапынан нақтылануы мүмкін.

Байқау екі кезеңнен тұрады. Бірінші кезең 3-15 қыркүйек аралығында Алматы қаласының 8 ауданында өтеді. Аудандық кезеңде қатысушылар белгіленген талаптарға сәйкес өнер көрсетеді. Әр ауданның мәдениет бөлімдері іріктеу кезеңін ұйымдастырып, жеңімпаздарды байқаудың финалдық кезеңіне жолдайды.

Екінші кезеңге аудандық іріктеу турларының жеңімпаздары қатысады. Екінші кезең 2026 жылдың 18 қыркүйек күні «Алатау» дәстүрлі өнер театры сахнасында өтеді.

Байқау қорытындысы бойынша қазылар алқасының шешімімен жеңімпаздар мен жүлдегерлер анықталады.

Жүлде қоры:

• I орын – 1 жеңімпазға 3 млн теңге;

• II орын – 1 жеңімпазға 2 млн теңге;

• III орын – 1 жеңімпазға 1 млн теңге;

• Ынталандыру сыйлықтары – 5 жеңімпазға 300 мың теңгеден.

«Алматыны аяла!» байқауы аға буын өкілдерінің шығармашылық белсенділігін арттыруға, олардың өнердегі мол тәжірибесін кейінгі ұрпаққа жеткізуге бағытталған. Жоба арқылы халық шығармашылығын дәріптеу, ұлттық және мәдени дәстүрлерді сақтау, сондай-ақ оларды заманауи сахна талаптарымен ұштастыру көзделеді.

Байқауға қатысу талаптары мен Ережесімен мына сілтеме арқылы танысуға болады:

БАЙҚАУ КООРДИНАТОРЛАРЫ:

Басты координаторлар:

Нәсіпжан Басшыбай: +7701 367 04 27

Инара Аубакирова: +7707 365 91 39

Аудан координаторлары:

Бостандық ауданы:

+7 707 049 03 03,

Медеу ауданы:

+7 747 326 57 36

+7 702 641 07 04

kultura.medeu@mail.ru