Жаңа байланыс форматының негізгі міндеті – қала тұрғындарына Алматының дамуы, Бас жоспардың негізгі ережелері және оның нақты аумақтарға ықтимал әсері туралы түсінікті әрі сенімді ақпарат ұсыну, – деп хабарлайды aqshamnews.kz тілшісі.
Алматының Бас жоспары туралы ақпараттың қолжетімділігін арттыру және қала тұрғындарымен тікелей байланыс орнату мақсатында «Алматыбасжоспар» тұрғындардың өтінішін қабылдайтын байланыс орталығын іске қосты.
Тұрғындар байланыс орталығына тікелей хабарласып, Бас жоспарға қатысты сұрақ қоя алады, нақты аумақтар бойынша ақпаратты нақтылап, жылжымайтын мүлік пен жер теліміне қатысты құжаттарға байланысты туындайтын мәселелер жөнінде түсініктеме ала алады.
«Бас жоспар бүкіл қаланың дамуына әсер ететін күрделі қала құрылысы құжаты екенін түсінеміз. Тұрғындармен өткен кездесулерден кейін көптеген алаңдаушылықтың Алматының дамуына қарсылықтан емес, Бас жоспарда нақты не қарастырылғаны және оның белгілі бір аумаққа қалай әсер етуі мүмкін екені туралы түсінікті әрі нақты ақпараттың жеткіліксіздігінен туындайтынын байқадық», – деді «Алматыбасжоспар» бас директоры Асхат Садуов.
Оның айтуынша, әлеуметтік желілерде Бас жоспар туралы қала құрылысы саласында кәсіби білімі жоқ адамдар тарататын ақпарат көп. Соның салдарынан күрделі мәселелер кейде тым қарапайым түрде түсіндіріліп немесе ақпарат бұрмаланып беріледі. Бұл тұрғындардың алаңдаушылығын одан әрі күшейтеді.
«Сондықтан әр адам ресми дереккөзден ақпарат ала алатын тікелей әрі қолжетімді байланыс арнасын құруды маңызды деп санаймыз. Сонымен қатар әр отбасының өзіндік нақты жағдайы болуы мүмкін екенін түсінеміз. Сол себепті байланыс орталығында жалпы түсіндірмелермен қатар, жер учаскелері мен жылжымайтын мүлікке қатысты құжаттар бойынша жеке кеңес те беріледі. Біздің міндетіміз – тұрғындарға жағдайын түсінуге, қолындағы құжаттарды анықтауға, қандай мәселелер қосымша рәсімдеуді немесе нақтылауды қажет ететінін білуге және оларды шешу үшін қайда жүгіну керектігін түсіндіруге көмектесу», – деді Асхат Садуов.
Байланыс орталығының жұмысымен қатар тұрғындармен түсіндіру кездесулері, жеке кеңес және халықтың Бас жоспар мен оның жүзеге асырылуы туралы хабардарлығын арттыруға бағытталған өзге де іс-шаралар өткізіледі.
Тұрғындарға ыңғайлы болу үшін «Алматыбасжоспардың» әлеуметтік желілердегі ресми парақшаларында соңғы ақпарат, түсіндірмелер және жиі қойылатын сұрақтарға жауаптар жарияланып отырады.
Байланыс орталығы:
WhatsApp: +7 705 653 8357
Instagram: @almaty_genplan
TikTok: @almatygenplan
Threads: @almaty_genplan
«Алматыбасжоспар» тұрғындарды Бас жоспар туралы ақпаратты ресми дереккөздерден алуға және туындаған сұрақтар бойынша тікелей хабарласуға шақырады. Бұл түсінбеушіліктің алдын алуға, таралып жатқан ақпараттың дұрыстығын тексеруге және әрбір нақты жағдайға қарай түсіндірме алуға мүмкіндік береді.