Алматы театрлары әлемнің ең ірі Avignon OFF 2025 театр фестивалінде сәтті өнер көрсетті, - деп хабарлайды Аqshamnews.kz тілшісі.
Avignon OFF 2025 атты айтулы халықаралық фестивальде Алматы театрларының қойылымдары аншлагпен өтті. Journées de l’Asie centrale бағдарламасы аясында Қазақстан қонақ ел ретінде қатысып, Алматы басты мәдени орталыққа айналды. Қала театр өнерінің ең озық туындыларын паш етті.
Фестивальдің ресми афишасына Алматыдан төрт театр кіріп, көрерменнің, халықаралық тәлімгерлер мен театр сыншыларының үлкен қызығушылығын тудырды. ARTiShok театры Atypik Théâtre сахнасында «Маяковский» перформансын қойса, Jolda Dance Theatre «Тамыр» қойылымын La Scierie сахнасында көрсетті. Алматы Мемлекеттік қуыршақ театры атақты «Ромео мен Джульетта» махаббат одасын La Scierie сахнасында сахналады. Ал «Алатау» театры Rouge Gorge сахнасында «Дала рапсодиясы» қойылымымен алматылық театрлардың өнерін түйіндеді.
Алматының бұл фестивальге қатысуы жай ғана жеңіс емес, Қазақстандағы тәуелсіз театр өнерінің дамуына жол ашқан тарихи оқиғаға айналды.
Алғаш рет қазақстандық театрларға Еуропаның ең ірі фестивалінің сахнасында осындай кең мүмкіндік беріліп, жаңа халықаралық әріптестікке және отандық театрды танытуға жол ашылды.
Алматы театрларының Франция жеріндегі өнерін Almaty Creative шығармашылық индустрияларды дамыту орталығы Алматы қаласы әкімдігінің қолдауымен ұйымдастырды.
Орталықтың жүйелі жұмысының арқасында алғаш рет бірыңғай кураторлық іріктеу жүргізіліп, фестиваль ұйымдастырушыларымен, халықаралық институттармен және БАҚ-пен өзара байланыс жолға қойылды.