2026 жылдың алғашқы жартыжылдығында Алматы халықаралық мәдени ынтымақтастықты едәуір кеңейтті. Бұл туралы қалалық Мәдениет басқармасының өкілдері хабарлады. Алты ай ішінде әлемдік деңгейдегі өнер жұлдыздары қатысқан 37 концерт ұйымдастырылды. Сонымен қатар Алматының мәдениет мекемелері Қазақстанның өнері мен мәдениетін әлемнің 10-нан астам қаласында таныстырды.
Маңызды оқиғалардың бірі 26 маусымда Шанхай тарихи музейінде өткен «Дәстүр сабақтастығы: ата-баба мұрасы» халықаралық көрмесінің ашылуы болды. Көрмеде Алматы музейлер бірлестігінің қорынан алынған 100-ге жуық бірегей жәдігер қойылып, келушілер қазақ халқының тарихы мен мәдени мұрасымен танысты.
Наурыз мейрамы аясында «Алматы әуендері» КМҚК-ның «Сазген сазы» фольклорлық-этнографиялық ансамблі Австриядағы әйгілі Вена концерт залында өнер көрсетіп, көрерменге ерекше концерттік бағдарлама ұсынды.
Сондай-ақ, жыл басынан бері Мемлекеттік академиялық қуыршақ театры Румынияда және өзге де елдерде өткен халықаралық фестивальдерге қатысып, қойылымдарын шетелдік көрермен назарына ұсынды.
