Алатау ауданындағы Оқушылардың инновациялық шығармашылық орталығында Алматы қаласы Білім басқармасының алқа отырысы өтті. Алқа отырысы Білім басқармасының басшысы Сайран Сайфеденовтің төрағалығымен ұйымдастырылды, деп хабарлайды Aqshamnews.kz тілшісі.
Алқа жұмысына орта білім беру ұйымдарының, Қалалық білім берудегі жаңа технологиялардың ғылыми-әдістемелік орталығы, Психологиялық қолдау орталығы, Қалалық дене шынықтыру және спорт оқу-тәжірибелік орталығының басшылары мен мамандары қатысты.
Алматы қаласы Білім басқармасының орта білім беру бөлімінің басшысы Ақмарал Айтуарова білім сапасы бойынша қорытынды есеппен таныстырды.
Педагогтердің біліктілігін арттыру, кадрларды даярлау бойынша ҚБЖТҒӘО директорының міндетін уақытша атқарушы Сандуғаш Атейбек баяндама жасады.
Оқушылардың спорттағы негізгі жетістіктерін Қалалық дене шынықтыру және спорт оқу-тәжірибелік орталығының басшысы Бахтияр Елемесов ұсынды.
Психологиялық қолдау орталығының директоры Венера Қоқанова кәмелетке толмағандарға қатысты буллинг, зорлық-зомбылық, суицид, өзіне-өзі зиян келтірудің алдын алу бойынша жүргізілген жұмыстардың қорытындысын таныстырды.
Алқа отырысында «Мақсатты мектептер» жобасы аясында Педагогикалық шеберлік орталығы мен Shoqan Academy-де мұғалімдерді қайта даярлау курстарында педагогтердің біліктілігін арттыру нәтижелері айтылды.
Сондай-ақ, орта білім беру ұйымдарында орын тапшылығын азайту мен жағдайды жақсарту бағытында оң өзгерістердің бар екені атап өтілді. Атап айтқанда, қосымша құрылыс жүргізу, мектептерді күрделі жөндеуден өткізу белсенді түрде қолға алынған, жаңа заманауи мектептерді жаңа оқу жылында пайдалануға беру жоспарлануда.
Жылыту маусымына дайындықты уақтылы қамтамасыз ету мақсатында Алматы қаласы Білім басқармасының басшысы мектеп директорларына 20 тамызға дейін дайындық актілерін өткізуді тапсырды.
Алқа отырысы барысында Білім басқармасының басшысы білім беру жүйесін дамыту және жаңғырту, инновациялық технологияларды енгізу, әдістемелік қамтамасыз етуді жетілдіру жұмыстарын жалғастыруды тапсырды.
Сайран Сайфеденов оқушылардың үлгерімін арттыруға үнемі назар аудару қажеттігін атап өтті. Сонымен қатар, мектепті аяқтағаннан кейін де оқушылармен байланыста болып, олардың жоғары оқу орындарына түсуі мен болашақта жұмысқа орналасуына жағдай жасау маңызды екенін айтты.
Сондай-ақ, Алматы қаласы оқушыларының жазғы демалыс кезеңіндегі бос уақытын тиімді ұйымдастыру, ата-аналар тарапынан бақылауды қамтамасыз ету, балалар мен жасөспірімдердің қауіпсіздігін қамтамасыз ету шаралары аясында мониторинг жүргізуді тапсырды.