Кеше Алматы қаласы Жетісу ауданындағы N57 жалпы білім беретін мектебінде Ұлы Отан соғысындағы Жеңістің 80 жылдығына арналған «Ұлы Жеңіс: Ерлікке тазым, ұрпаққа үлгі» атты мерекелік іс-шара өтті.
Іс-шараға Ұлы Отан соғысы және тыл ардагерлерінің ұрпақтары, Ауғанстандағы соғыс ардагерлері, Жетісу ауданы әкімдігі мен аудандық білім бөлімінің өкілдері, «АМАНАТ» партиясы Жетісу аудандық филиалының төрағасы, ұстаздар қауымы мен оқушылар қатысты.
Құрметті қонақтардың қатарында:
- Алматы қаласы Ауған соғысы ардагерлер одағының төрағасы Горпиненко Владимир Петрович;
- Чернобыль ардагерлері мен ерекше қауіп төнген жауынгерлер одағының төрағасы Перминов Валерий Петрович;
- Ауған соғысының ардагері Ким Владлен Львович;
- Чернобыль атом-электр станциясының жоюшысы Кан Игорь Афанасьевич;
- Чернобыль атом электр станциясының ардагері Усеинов Ануар Билалович;
- Ата-аналар қоғамының төрайымы Нұрмағамбетова Зәуре Бектұрғанқызы болды.
Іс-шара Қазақстан Республикасының Туын салтанатты түрде енгізу және Мемлекеттік Гимнді орындаумен басталды. Мектептің «Жетісу жауһарлары» оркестрінің өнерпаздары қазақтың белгілі композиторларының шығармаларын орындады. Оқушылар келген қонақтарға соғыс әндерін сахналық қойылымдармен ұсынып, өз рөлдерін бар ынтасымен сомдады. Бүлдіршіндер көркемсөзден жыр оқып, әсем әндер орындады. Концерт барысында жиналғандар соғыста қаза тапқандарды бір минут үнсіздікпен еске алды.
57 жалпы білім беретін мектеп директоры Гүлбану Қонысбайқызы өз сөзінде ерлік пен қаһармандықтың үлгісіне айналған ардагерлерге жылы лебізін білдіріп, Ұлы Жеңістің 80 жылдығымен құттықтады. Ол өз сөзінде іс-шараның мақсаты жастардың ардагерлерге, аға ұрпаққа деген құрметті көзқарасын қалыптастыру, өз елінің тарихына деген қызығушылығын, патриоттық және туған жеріне деген мақтаныш сезіміне тәрбиелеу мақсатында екендігіне баса назар аударды.
"Ешкім де, ештеңе де ұмытылмайды. Бұл сөздер өткенді емес, болашақты меңзейді. Қаһарман батырларымыздың ерліктерін ешкім де ешқашан ұмытпайды. Бұл күн қанды майданнан оралмай, еліміз үшін сенімді қорған бола отырып, жеңіске жету үшін күрескен ата-бабаларымызды еске алу күні", - деді Гулбану Қонысбайқызы.
Шара соңында бүкіл зал №57 мектептің мұғалімдер хорымен бірге «Жеңіс күні!» әнін шырқады.Мұндай шаралардың тәрбиелік мәні зор. Аға буын ардагерлеріміздің көрсеткен ерлігі мен батырлығынан бүгінгі ұрпақ сабақ алады деген сенімдеміз.
Баршаңызды Ұлы Отан соғысындағы Жеңістің 80 жылдығымен құттықтаймыз.
Тәуелсіз Қазақстанның бақытты да бейбіт күндері үшін ардагерлерімізге тағзым етеміз!