Былтырдан бері толыққанды жүзеге асырыла бастаған «Адал азамат» бағдарламасының негізінде қаладағы №59 мектеп-гимназиясында «Адал адам – Адал еңбек – Адал табыс» тақырыбында құндылыққа негізделген тәсілдер айлығы ұйымдастырылды.
Айлық жоспары бойынша мектептің барлық бірлестігі үш кезеңге бөлініп, әр кезеңде әртүрлі жобалар іске асырылды. Олар әділдік, жауапкершілік, заң және тәртіп, бірлік және ынтымақ, еңбекқорлық және кәсіби біліктілік, жасампаздық және жаңашылдық сияқты құндылықтарды дамытуға бағытталды.
Қазақ тілі мен әдебиеті пәндер бірлестігі тәуелсіздік және отаншылдық құндылықтарын жүзеге асыру мақсатында бірқатар тәрбиелік іс-шара өткізді. Мәселен, «Балалар кітапханасы» жобасы аясында 5-сынып оқушылары «Ер Төстік – ел қорғаған ер» тақырыбында көркем оқу мен театрландырылған қойылым ұсынды. Бұл қойылым арқылы жеткіншектер әдеби кейіпкерлерді танып, ел қорғау мен адалдық ұғымдарын тереңірек ұғынды.
Жоғары сынып оқушылары тәуелсіздік тақырыбындағы шығармалар бойынша буктрейлер жасап, шығармашылық қабілетін көрсетті. Сонымен қатар, «Тәуелсіздік жылдарындағы шығармалардағы адалдық тақырыбы» атты жас жазушылармен кездесу ұйымдастырылды. Бұл оқушылардың әдебиетке деген қызығушылығын арттырып, еркін ой алмасуға мүмкіндік берді.
«Айлық аясында «Құндылық бастауы – халық ауыз әдебиеті» атты комикстер көрмесі де ұйымдастырылып, ұлттық мұра заманауи форматта ұсынылды. Махамбет Өтемісұлы шығармалары бойынша өткен куиз батл оқушылардың білімін шыңдап, рухын көтерді. Кітап көрмесі арқылы жас ұрпақтың кітапқа деген қызығушылығын арттыруға бағытталған іс-шаралар да сәтті ұйымдастырылды. Мұндай тағылымды жобалар жас ұрпақты саналы, жауапкершілігі жоғары тұлға ретінде тәрбиелеудің маңызды қадамы екені сөзсіз», – дейді №59 мектеп-гимназиясы директорының оқу ісі жөніндегі орынбасары Камшат Егеубаева.
