Алматы Оқушылар сарайының жас өнерпаздары «Бозторғай» гала-концертінде өз өнерлерін паш етті, – деп хабарлайды aqshamnews.kz тілшісі.
Алматы қаласында қала әкімдігінің қолдауымен XVIII Халықаралық балалар шығармашылығы «Бозторғай» байқауының қорытындысы ретінде ұйымдастырылған «Бала әлемі» атты гала-концерт өтті. Ауқымды мәдени шара тағы бір мәрте «Бозторғайдың» посткеңестік кеңістіктегі ең беделді жас таланттар байқауларының бірі екенін айқын дәлелдеді.
28 мамыр мен 1 маусым аралығында өткен байқауға әртүрлі елдерден келген вокалшылар, хореографиялық ұжымдар, аспаптық орындаушылар мен сән театрлары қатысты. Қатысушылар 10 жастан 18 жасқа дейінгі бірнеше жас санатында өнер көрсетсе, 10 жасқа дейінгі бүлдіршіндер үшін арнайы номинациялар қарастырылды. Байқаудың қатаң талаптары – тек минустық фонограмманы пайдалану, екі шығарманы орындау, ал қазақстандық хореографиялық ұжымдар үшін міндетті түрде қазақ биін ұсыну шарты қатысушылардың жоғары кәсіби деңгейін айқындады.
Биыл өз өңірінің намысын Алматы қаласы Оқушылар сарайының тәрбиеленушілері қорғады. Бұл білім ордасы осындай ауқымды мәдени іс-шараларды ұйымдастыру мен өткізуде маңызды миссия атқарып келеді. Мұнда жас өнерпаздардың орындаушылық шеберлігі ғана емес, жауапкершілік сезімі, сахна мәдениеті мен ұлттық дәстүрлерге деген құрметі де қалыптасады.
Мерекелік гала-концертте Дастан Тұрдалы, Ерболат Әліма және Қанапия Омар сынды жас дарындар жоғары деңгейдегі өнерлерін паш етті. Олар көрермендердің ыстық ықыласына бөленіп, залдың зор қошеметіне ие болды. Жас орындаушылардың жарқын өнері табандылық пен ұстаздардың қолдауы талантты балаларды нағыз сахна жұлдыздарына айналдыратынын көрсетті.
«Бозторғай» байқауы 1998 жылдан бері өткізіліп келеді. Осы уақыт ішінде ол көптеген дарынды өнерпаздардың жолын ашып, олардың шығармашылық тұрғыдан қанаттануына мүмкіндік берді. Байқау лауреаттары дипломдармен ғана емес, түрлі мәдени ортадан келген құрдастарымен тәжірибе алмасып, рухани тұрғыдан толысуға жол ашатын баға жетпес тәжірибемен де марапатталады.