2026 жылы 5 наурызда сағат 11:00-де Алматы музейінде Халықаралық әйелдер күні — 8 наурыз мерекесіне орай «Мен қазақ қыздарына қайран қалам» атты көрмесі салтанатты түрде ашылды, – деп хабарлайды aqshamnews.kz тілшісі.
Көрме қазақ әйелдерінің ел тарихы, мәдениеті мен өнеріндегі ерекше рөліне арналған.
Экспозицияда Алматы музейінің қорынан алынған, қазақ мәдениеті мен өнерінің дамуына қомақты үлес қосқан көрнекті тұлғаларға тиесілі бірегей жәдігерлер ұсынылды. Бұл туралы Алматы қаласы Мәдениет басқармасының өкілдері хабарлады.
Көрме аясында келушілер ұлттық өнер мен сахна мәдениетінің дамуына зор үлес қосқан көрнекті өнер қайраткерлерінің шығармашылық мұрасымен таныса алады. Олардың қатарында қазақ өнерінің аңызға айналған жұлдыздары Хадиша Бөкеева, Роза Бағланова, Бибігүл Төлегенова, Роза Жаманова, Мәдина Ералиева және Сәуле Жанпейісова бар. Экспозицияда олардың жеке заттары, концерттік және сахналық костюмдері, архивтік фотосуреттері, құжаттары мен портреттері қойылған.
Көрмеде қазақ сахналық өнерінің қалыптасу кезеңін айқындайтын сахналық костюмдер мен концерттік киімдерге ерекше орын берілген. Сонымен қатар сирек кездесетін архивтік фотосуреттер мен құжаттар арқылы көрнекті өнерпаздардың шығармашылық және өмір жолымен тереңірек танысуға мүмкіндік жасалған.
Көрменің мақсаты — өнер мен мәдениет кеңістігіндегі әйел бейнесінің маңызын тереңірек ұғындыру, сондай-ақ қазақ мәдениетінің көрнекті өкілдерінің шығармашылық мұрасын кеңінен насихаттау. Экспозиция қазақ әйелдерінің ұлттық мәдениетті дамытудағы үлесін, олардың таланты мен рухының беріктігін, өнерге деген адалдығын айқын көрсетеді.
Көрменің ашылу рәсіміне мәдениет және өнер саласының өкілдері, зиялы қауым, бұқаралық ақпарат құралдарының өкілдері, студенттер, сондай-ақ қала тұрғындары мен қонақтары қатысты. Іс-шара барысында қатысушылар мәдени мұраны сақтау мен насихаттаудың маңызын, сондай-ақ отандық өнердің дамуындағы әйелдердің ерекше рөлін атап өтті.
Көрме 12 наурызға дейін келушілер үшін ашық болады.