Алматы колледждері педагогтерінің командасы республикалық спартакиадада бақ сынауда, – деп хабарлайды aqshamnews.kz тілшісі.
Шымкент қаласында еліміздің колледж оқытушылары мен қызметкерлерін біріктірген ауқымды жарыс басталды. Бұл додада Алматы қаласының намысын тәжірибелі педагогтер командасы қорғауда.
1–6 маусым аралығында Шымкент қаласында техникалық және кәсіптік білім беру ұйымдарының педагогтері мен қызметкерлері арасында республикалық спартакиада өтуде. Аталған спорттық іс-шараны Қазақстан Республикасы Оқу-ағарту министрлігі, «TALAP» коммерциялық емес акционерлік қоғамы және Түркістан облысының білім басқармасы ұйымдастырған. Жарыстың негізгі алаңы ретінде Түркістан жоғары көпсалалы аграрлық колледжі таңдалды.
Спартакиада екі кезеңнен тұрады. Аймақтық іріктеу жарыстары 30 мамырда аяқталып, олардың қорытындысы бойынша үздік командалар республикалық финалда бас қосты. Бағдарламаға спорттың тоғыз түрі енгізілген. Атап айтқанда, шағын футбол, ерлер мен әйелдер арасындағы волейбол, баскетбол, үстел теннисі, тоғызқұмалақ, асық ату, бес асық және арқан тарту бойынша сайыстар өтуде.
Салтанатты ашылу рәсімі жоғары деңгейде ұйымдастырылып, одан кейін қатысушылар алғашқы жарыстарға кірісті. Командалар арқан тартуда күш-қайратын, ал ұлттық зияткерлік ойын – тоғызқұмалақта шеберлігі мен тактикалық дайындығын көрсетті.
Спартакиадаға қатысып жатқан Алматы қаласының делегациясына ерекше назар аударылуда. Мегаполистің абыройын қорғайтын команданың құрамында Алматы мемлекеттік бизнес колледжінің директоры Асхат Жанбосынов та бар. Ол жарысқа қатысушыларға қолдау білдіріп, туған қаланың намысын лайықты қорғауға тілектестік білдірді.
Жарыс ережесіне сәйкес, қатысушылар колледждердің штаттағы қызметкерлері болуы және олардың педагогикалық жүктемесі кемінде 720 сағатты құрауы тиіс. Сондай-ақ барлық спортшылардың жасы 20-дан жоғары болуы қажет. Командалық спорт түрлерінде 40 және 45 жастан асқан ойыншылардың қатысуы міндетті шарт ретінде белгіленген.
Спартакиада жеңімпаздары мен жүлдегерлері ұйымдастырушылар атынан кубоктармен, медальдармен және дипломдармен марапатталады.
Алда қатысушыларды тартысты әрі жауапты жарыс күндері күтіп тұр. Бұл дода техникалық және кәсіптік білім беру жүйесінің педагогтері мен қызметкерлері тек сапалы білім беріп қана қоймай, спорт алаңында да табандылық пен жеңіске деген жігердің үлгісін көрсете алатынын дәлелдейді.