Қаладағы №15 гимназияда Білім күні ерекше өтті, – деп хабарлайды aqshamnews.kz тілшісі.
Дәлірек айтсақ, биыл білім ордасына тарыдай болып кірген, 1-сыныпқа қабылданған 300 балдырғанға кітап сыйланды.
Бүлдіршіндерге «Кітап оқитын ұлт» жобасы мен «Кітапханадан сыйлық» акциясы аясында көркем шығармалар тарту идеясын ұсынған – Алматы кітапханалар жүйесі.
А.П.Чехов атындағы Орталық қалалық кітапхана меңгерушісі Айнұр Балаубаеваның айтуынша, осынша мол кітап қорының жиналуына «Steppe World», «KitapAl Almaty» ЖК – «KitapAl» баспа дүкені, «Ол-Жас Баспасы» ЖШС, «Kazformoms», «Астана» кітап баспасы, «Ziyat» кітап дүкені және Баян Болатханова, Ділдәр Мамырбаева, Сәуле Досжан, Мирас Кесебаев секілді қаламгерлер үлес қосқан.
«Бұл кітаптардың мектеп табалдырығын алғаш аттап отырған кішкентай бүлдіршіндеріміздің ең сенімді, рухани досы болатынына сенеміз. Біздің балаларды қуантқымыз келген ұсынысымызды қабыл алған №15 гимназия директоры Зоя Қашқынбайқызына алғыс білдіреміз. Баршамыздың мақсатымыз – өскелең ұрпақты бала кезінен кітап оқуға дағдыландыру, халық арасында оқу мәдениетін қалыптастыру, түптеп келгенде, бүтін ел болып әлемдегі ең көп кітап оқитын он елдің қатарына ену», – дейді Айнұр Мұратқызы.
Осы орайда айта кетсек, «Кітап оқитын ұлт» – Мемлекет басшысының тапсырмасымен дүниеге келген тың жоба. Бұл елімізде тұрақты оқу мәдениетін қалыптастыруға бағытталған зияткерлік-ағартушылық бастама. Мақсаты – кітап оқуды насихаттау, сыни ойлауды дамыту және кітапты білім, шабыт және зияткерлік өсудің негізгі көзі ретінде нығайту.
«Президентіміз «Озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда орнықтыруымыз керек» деген болатын. Жаңа оқу жылы – жаңа белес, жаңа мақсат, жаңа мүмкіндіктер. Мектеп – тек білім алатын орын ғана емес, сонымен қатар әр баланың тұлға болып қалыптасуына, өз пікірін еркін білдіруіне және жауапкершілікпен әрекет етуіне мүмкіндік беретін орта. Бізге сыйланған осы кітаптардың кішкентай жүректерге ізгілік, мейірім, адамгершілік дәнін себетіні анық. Алматы кітапханаларына алғысымыз шексіз», – дейді №15 гимназияның кітапханашысы Райхан Мыңжасарова.
Балақайларға сыйға ұсынылған кітаптардың ішінде Ыбырай Алтынсариннің «Кел, балалар, оқылық!», Абай Құнанбайұлының «Адамды сүй», Ахмет Байтұрсынұлының «Маса», Джек Лондонның «Ақ азу», Рудольф Эрих Распенің «Мүнхаузен», Ребекка Элиоттың «Мейірім күні» секілді көркем туындылар бар.
Нұржамал ӘЛІШ