Қала мерекесіне орай, Алматы қаласы мәдениет басқармасына қарасты «Алатау» дәстүрлі өнер театрының көру мүмкіндігі шектеулі жандардың мәдени демалысын ұйымдастыру бөлімінде «Алматы – әсем қала» атты әдеби-сазды концерт өтті.
Қос жанарынан айрылса да жүрегі өнер деп соққан ерекше жандардан ұйымдастырылған «Ата мұра» ұлт-аспаптар ансамблі күмбірлеген күйлерімен іс-шараны бастады. ҚР білім беру ісінің үздігі, ардагер-ұстаз, ақын Гүлқадиша Нысанбаева Алматыға арналған өлеңдерін оқыса, Желтоқсан көтерілісінің қаһарманы Жұлдызай Қанапияқызы мен кәсіпкер Амина Төлекова ақ тілектерін жеткізді.
«Армандастар» ансамблі «Сағындым Алматыны», «Жайлаукөл кештері» әндерін әуелете шырқаса, ансамбль солистері: Әспеткүл Айтжанова, Владимир Умеров, Светлана Тоқабаева, Альнора Мурдинова әсем қаламыз туралы танымал әндерді қазақ, орыс тілдерінде шырқады. Бөлім басшысы ҚР Мәдениет қайраткері Ғазизхан Әділханов келген қонақтар мен өнерпаздарға үлкен алғысын білдірді. Концертті бөлімнің көркемдік жетекшісі Гүлмира Бөбешікова жүргізді.
