Алаң нағыз этноауылға айналды: мұнда концерттік сахна орнатылып, ұлттық тағамдар мен кәдесый сатылатын сауда орындары ашылған, тура жанына көшпелі өмірдің көрінісін бейнелейтін киіз үйлер тігіпті.
Қонақтарға әуезді музыка мен дәстүрлі тағам ұсынып қана қоймай, осы жолы оларды алып батырлар да қарсы алды. Бұл әсерлі бейнелер мерекенің басты ерекшелігіне айналып, балалар мен ересектердің басын қосқан сүйікті фотонүктеге айналды, - деп хабарлайды aqshamnews.kz тілшісі.
Әсіресе аста-төк дастарқан ерекше назар аударды. Алатау ауданының тұрғындары Наурыздың басты тағамы — наурыз көже пісіріп, сонымен қатар түрлі ұлттық тағам ұсынып, келген қонақтардың түгелі одан дәм татып шықты.
Қала тұрғындарының өзі де мерекенің ажарын ашты. Көпшілігі мұнда ұлттық киіммен келіпті.
Әсем камзолдар, шапандар мен әшекейлер мерекенің көркін кіргізді.
Мұндағы.хан тағы халықты тартқан ерекше орынның бірі болды. Өзін хан немесе ханша сезінгісі келген әр адам сонда отырып естелікке суретке түсті.