"Almaty aqshamy" газетінің басшылығы ауысты
Қаланың бас басылымдарының бірі жаңа тәжірибелі командаға сеніп тапсырылды. Бұл туралы "Alatau Aqparat" медиа холдингінің директоры Ержан Қалымбайұлы ресми хабарлады
Газеттің бас редакторы қызметіне журналист Естай Божан тағайындалды. Ол медиа саласында өзіндік қолтаңбасы бар, қаламы жүйрік маман ретінде белгілі.
Сонымен қатар редакция құрамында басқа да ауыс-түйіс болды. Бас редактордың орынбасары болып Серік Жұмабаев, жауапты хатшы ретінде Құралай Иманбекқызы тағайындалды.
Ержан Қалымбайұлының айтуынша, бұл үш маман да "Ақшамның" өз қазанында қайнап, тәжірибе жинаған мамандар. Олардың кәсіби біліктілігі басылымның дәстүрлі құндылықтарын сақтап, оны заманауи форматқа бейімдеуге мүмкіндік береді.
"Almaty aqshamy" - қазақ журналистикасында орны бөлек, тарихи басылым. Бұрын газетті Ерғали Сағат пен Қали Сәрсенбай сияқты марғасқалар басқарған. Кейінгі жылдары тізгінді ұстап келген Төрехан Данияров құрметті еңбек демалысына шықты. Әріптестері оған газеттің дамуына қосқан үлесі үшін алғыс айтып, жаңа өмір кезеңінде сәттілік тіледі.
Жаңарған команда газетті жаңа деңгейге көтеріп, мегаполистің тыныс-тіршілігіне сай мазмұн ұсынуды мақсат етіп отыр. "Almaty aqshamy" оқырмандардың сұранысына жауап бере отырып, дәстүрлі құндылықтарын сақтап, заман талабына сай жаңаша форматта жұмысын жалғастырады деген сенім бар.
