Алматы студенттер үшін әлемдегі ең қолайлы қалалар рейтингінде 78-орынға ие болды. Бұл - Қазақстан қалалары арасындағы ең үздік көрсеткіш, – деп хабарлайды aqshamnews.kz тілшісі.
Quacquarelli Symonds (QS) халықаралық білім беру компаниясы студенттерге қолайлы үздік қалалардың жыл сайынғы рейтингін жариялады.
Алматы 150 қаланың ішінде 65,1 ұпай жинап, 78-орынға тұрақтады. Ал Астана 55 ұпаймен 119-орыннан көрінді.
Рейтингтің көшін Сеул бастады. Одан кейін Токио мен Лондон тұр. Сондай-ақ, үздіктер қатарынан Мельбурн, Мюнхен және Сидней де орын алды.
Өңір қалалары арасында Алматы Баку (95-орын), Тбилиси (130-орын), Бішкек (137-орын) және Ташкенттен (146-орын) жоғары нәтиже көрсетті.
QS Best Student Cities рейтингі қалаларды жоғары оқу орындарының сапасы, студенттер үшін тартымдылығы, оқу бітіргеннен кейінгі жұмыс мүмкіндігі, өмір сүру құны және студенттердің пікірі секілді бірнеше өлшем бойынша бағалайды.