Алматылық «Қайрат» пен кипрлік «Пафос» арасындағы матч алдында Орталық стадионға жанкүйерлер жиналды. Ойын алдындағы атмосфера қандай? Аqshamnews.kz тілшісі оқиға орнынан эксклюзив фотолар ұсынады.
«Қайратқа» сенім артқан жанкүйерлер
Ойынға бірнеше сағат қалса да, Орталық стадион маңында жанкүйерлердің қарасы қалың. Жастар да, орта жастағылар да, тіпті балаларымен келген отбасылар да көп. Барлығының жүзінен қуаныш, қобалжу мен мақтаныш сезімі байқалады. Жанкүйерлер қолдарына туларын, шарфтарын ұстап, ұрандап, ән айтып, клубқа деген шынайы қолдауларын білдіріп жатыр.
Алмасбек Батырдың ерекше көлігі көзге түсті
Жанкүйерлер арасында Алмасбек есімді жанкүйер өзінің арнайы безендірілген көлігімен келген. Бұл көлік – кәдімгі көлік емес, «Қайраттың» қозғалмалы көрмесі дерсің.
Көлік сыртына клубтың логотипі салынып, сары-қара бояулармен көмкерілген.
Футбол – отбасылық мерекеге айналды
Ойын алдындағы ең әсерлі көріністердің бірі – балаларымен келген жанкүйерлер. Көптеген отбасылар бұл матчты асыға күтіп, арнайы дайындалып келген.
Әкесі мен ұлы бірдей футболкалар киіп, анасы мен қызы жалауша ұстап, фотоға түсіп жүр.
Клуб атрибутикасына сұраныс жоғары
Стадион сыртында бірнеше шағын сауда орындары орналасқан. Мұнда клуб жейделері, шарфтары, жалаушалар мен қалпақтар сатылып жатыр.
Жанкүйерлер сүйікті командаларының символикасын кеуделеріне тағып, стадионға ерекше дайындықпен кірмек.
Ойын басталмай жатып-ақ атмосфера қыза түсті. Алматыдағы Орталық стадион маңында шынайы футбол мейрамы өтіп жатыр десе де болады. Жанкүйерлер тек жеңіс үшін емес, "Қайратқа" рух беру үшін жиналған. Ал біз матчтың өзінен де, нәтижесінен де үміт күтеміз.
