Алматы әкімі Дархан Сатыбалды аудан әкімдігі, тиісті басқармалар, коммуналдық қызмет пен бағынысты ұйымдар өкілдерінің қатысуымен Әуезов ауданында кеңес өткізді, деп хабарлайды Aqshamnews.kz.
Негізгі мәселелердің бірі «Сайран» автовокзалы мен «Car City» сауда орталығы маңындағы жағдай. Мұнда жекеменшік таксилердің тұрақты жиналуы тұрғындардың наразылығын туғызып, шу, санитарлық талаптардың сақталмауы және кешкі мезгілде қауіпсіздіктің төмендеуі сынды мәселелерге себеп болып отыр.
Дархан Сатыбалды аудандық полиция басқармасына патрульдеу жұмысын күшейтіп, аталған нысандардың маңындағы тәртіпті реттеуді тапсырды.
Әуезов – Алматыдағы халық ең тығыз қоныстанған аудандардың бірі, мұндағы тұрғын үйлердің көпшілігі кеңес дәуірінде салынған. 2025 жылы мұнда 37 көпқабатты үйдің қасбеті күрделі жөндеуден өтпек.
Алматы әкімінің айтуынша, жұмыстарды жүргізу кезінде бірыңғай сәулеттік стандартты сақтау маңызды, бұл қаланың үйлесімді келбетін қалыптастыруға ықпал етеді.
«Бүкіл қалаға қолдануға болатын шешім қабылдауымыз қажет. Қазір Алматының сегіз ауданында әкімдер жобаларды өз бетінше жүзеге асырып жатыр. Бізге бірыңғай тәсіл керек», – деді Дархан Сатыбалды.
Сондай-ақ, Әуезов ауданында қоғамдық кеңістіктерді дамыту міндеті тұр. Бастапқыда бұл аудан «тұрғын» ретінде жобаланғандықтан, уақыт өте келе мұнда саябақ пен скверлер тапшылығы туындады. Бүгінде бір ғана жекеменшік саябақ жұмыс істейді. Тиісті басқармалармен бірлесіп, саябақтар мен жасыл желектерді көбейту жобалары қарастырылуда.
Инженерлік инфрақұрылым құрылысы, тарату жылу желілерін қайта жаңғырту, сыртқы жарықтандыру желілерін жаңарту жалғасып, көптеп ағаш отырғызу мен аулалар кешенді абаттандыру жұмыстары қолға алынған.
«Ауданды дамыту керек. Жүзеге асқан жобаны тұрғындар оны көріп, бағалауға тиіс. Жүргізілген жұмыстардың нәтижесі кемінде 15 жыл сақталып, бұл мерзім ішінде қайта жөндеу қажеттілігі тумауы керек», – деді Дархан Сатыбалды.
Кеңес аясында Алматы әкімі Әуезов ауданы тұрғындарын жеке қабылдады. Мемлекеттік бағдарлама аясында шатырларды күрделі жөндеу, мемлекеттік жалдамалы тұрғын үй беру, сондай-ақ, инклюзия, жұмыспен қамту, халықтың әлеуметтік осал топтарын қолдау және атаулы әлеуметтік көмек алу мәселелері талқыланды. Тұрғындарға түсініктеме беріліп, әрбір өтініш бойынша нақты іс-шаралар мен орындау мерзімі белгіленді.