Қытай Халық Республикасына жұмыс сапары барысында Алматы әкімі Дархан Сатыбалды Қытайдың ірі құрылыс корпорацияларының бірі – әлемнің көптеген елдерінде ауқымды инфрақұрылымдық және девелоперлік жобаларды жүзеге асырып келе жатқан «Shanghai Construction Group» (SCG) басшыларымен кездесті. Қытай тарапынан делегацияны компанияның президент міндетін атқарушы Сюэ Юншэнь жетекшілік етті.
Келіссөз барысында тараптар қалалық ортаны кешенді дамыту, заманауи сәулеттік және мәдени нысандар салу, сондай-ақ Алматыда инновациялық және туристік кластерлер қалыптастыру бағытындағы ықпалдастық мүмкіндігін талқылады.
Дархан Сатыбалды Алматыда инфрақұрылымды жаңғырту және қолайлы, экологиялық әрі заманауи қалалық кеңістік құру бойынша жүйелі жұмыс жүргізіліп жатқанын атап өтті. Әкім Shanghai Construction Group компаниясының әлемдік деңгейдегі жобаларды табысты жүзеге асыру тәжірибесіне жоғары баға беріп, бірлескен жұмыстың айтарлықтай әлеуеті бар екеніне сенім білдірді.
Кездесу барысында компанияның қала үшін басым бағыттардағы жобаларға қатысу мүмкіндігіне ерекше назар аударылды. Атап айтқанда, қоғамдық кеңістіктерді, мәдени-ойын-сауық және технологиялық орталықтарды дамыту, жаңа қалалық аумақтарды игеру және көлік инфрақұрылымын жетілдіру бағыттары қаралды.
Өз кезегінде Shanghai Construction Group басшылығы ынтымақтастықты кеңейтуге қызығушылық танытып, серіктестіктің нақты бағыттарын қарастыруға дайын екенін білдірді. Келіссөз нәтижесі бойынша тараптар Алматы қаласының қалалық және туристік инфрақұрылымын дамыту саласындағы бірқатар маңызды жобаларды жүзеге асыруға негіз болатын ынтымақтастық туралы меморандум жобасын дайындау жөнінде уағдаласты.
Анықтама үшін: Shanghai Construction Group (SCG) – 1994 жылы құрылған және Шанхай қаласының муниципалдық басқару жүйесіне кіретін Қытайдың жетекші мемлекеттік құрылыс корпорациясы. Компания 30-дан астам елде инфрақұрылым, тұрғын үй және коммерциялық нысандар, көпірлер, метрополитен желілері және мәдени кешендер салу жобаларын жүзеге асырады. SCG-дің әлемге танылған жобаларының қатарында Шанхай мұнарасы, «Шығыс інжу» телемұнарасы, Лупу көпірі және Xujiahui Center кешені бар.