Алматыда қала әкімі Дархан Сатыбалдының төрағалығымен көктемгі көгалдандыру жұмыстарының қорытындысы мен күзгі ағаш егу науқанына дайындық мәселесі талқыланған жиын өтті, – деп хабарлайды aqshamnews.kz тілшісі.
Алматы қаласы Экология басқармасы өкілдерінің мәліметінше, көктемде қаланың барлық ауданындағы 55 учаскеге 6,5 мың ірі көлемді ағаш пен 500 мың бұта егілді. Бұл жұмыс Алматы жағалауларында, бульварлары мен өзге де қоғамдық кеңістіктерінде жүргізілді.
Жиында Қытайдың Ханчжоу қаласына барған мамандардың жұмыс сапарының нәтижесі де таныстырылды. Сапар барысында көгалдандыру және отырғызылатын материалдарды өсіру бағытындағы озық тәжірибе зерделенді. Оның қорытындысы бойынша Алматының климаттық жағдайына бейімделген өсімдіктерді Қытайдағы тәлімбақтардан тікелей жеткізу жөнінде келісімдерге қол жеткізілді.
Атап айтқанда, сәндік өсімдіктерді өсіруде көп жылдық тәжірибесі бар Zhejiang Jiande Shengyan Agricultural Technology Development Co., Ltd. компаниясы Алматыға отырғызылатын материалдарды іріктеу және көгалдандырудың заманауи тәсілдерін енгізу бойынша қолдау көрсетуге дайын екенін білдірді. Алдын ала Алматының климаттық және қалалық жағдайына бейімделу мүмкіндігі сыналатын ағаш, бұта және көпжылдық өсімдік түрлері анықталды.
Күзгі көгалдандыру науқаны аясында Алматының барлық ауданындағы 37 нысанға шамамен 2 мың ағаш пен 350 мың бұта егу жоспарланып отыр.
Қала әкімі Дархан Сатыбалды отырғызылатын материалдардың сапасын қатаң бақылауды және өсімдік таңдағанда олардың климаттық әрі қалалық орта жағдайына төзімділігіне ерекше мән беруді тапсырды. Сондай-ақ, көгалдандыру жұмыстары Алматыда жасыл желек жүйесін кезең-кезеңімен қалыптастыруға бағытталуға тиіс екені айтылды.