«Алатау» дәстүрлі өнер театрының артистері кабриолет-автобуспен шаһарды аралап, тұрғындарға перфоманс форматында концерт тарту етті. Олар аялдамаларға, көпқабатты үйлердің аулаларына және ашық алаңдарға тоқтап, көреременді келе жатқан Қала күнімен құттықтады.
Күміс көмей әншілер мен бишілер, қобызшылар мен күйшілер, баяншылар мен дауылпаздар қала жұртшылығына ұлттық өнерден шашу шашып, мерекелік көңіл-күй сыйлады. Көріністі тамашалаған алматылықтар шаттанып, қол бұлғап, әнге қосылып, би биледі. Күтпеген жерден концертке тап болған туристер де қазақы әуенге тәнті болып, ыстық ықыластарын білдірді.
«Бұл – ерекше бастама екен. Көңіліміз көтеріліп қалды. Аяқ астынан осындай концертке тап болдық. Форматы да ерекше. Келе жатқан қала күні құтты болсын! Баршаңызға амандық тілейміз. Қаламыз, еліміз көркейе берсін!», – деді темір жол вокзалы маңызнда перфомансты тамашалаған қала тұрғындарның бірі.
Ерекше форматтағы «Алматы – аялдамасы» жобасы қала күні аясында осымен екінші жыл өткізіліп отыр. Артистердің мерекелік керуені 19 қыркүйекке дейін жалғасады. Айта кетейік, бүгіннен бастап 21 қыркүйек аралығында Алматы музейлер бірлестігі метро бекеттерінде жылжымалы фотокөрме өткізуде. Көрмеге археологиялық артефактілер, зергерлік бұйымдар, спорт тарихы, Алматының ХХ ғасырдағы бейнесі және ұлы тұлғалардың аспаптары туралы фотосуреттер қойылды. Одан бөлек, 18 қыркүйекте метрополитен жолаушылары «Алматы әуендері» ұжымы ұйымдастырған концерттер мен перформансты тамашалай алады.
Алмтыда Қала күнін мерекелеу аясында жалпы 200-ден астам іс-шара өтеді. Мерекелік бағдарламалар мегаполистің барлық сегіз ауданында ұйымдастырылады. Орталық алаңдарда үлкен сахна орнатылып, танымал артистер өнер көрсетеді. Ашық аспан астындағы барлық концерт пен мәдени бағдарламаға кіру тегін. Негізгі мерекелік іс-шаралар 18-21 қыркүйек аралығында өтеді. Іс-шаралар жоспарымен Алматы қаласы әкімдігінің ресми сайтында таныса аласыздар.