Алматыда «АлЭС» АҚ-на қарасты Алматы 2-ЖЭО-ын жаңғырту жобасы жүзеге асырылып жатыр.
Жобаның негізгі мақсаты — қоршаған ортаға түсетін әсерді барынша азайтып, қаланың ең ірі жылу көзінің экологиялық қауіпсіздігін арттыру, – деп хабарлайды aqshamnews.kz тілшісі.
2-ЖЭО қаланың энергетикалық инфрақұрылымындағы негізгі нысандардың бірі саналады. 2012 жылы қыркүйектен бастап станция аумағы қала шегіне енгізіліп, Алматының Алатау ауданында орналасқан.
Жаңғыртудың басты мақсаты — энергиямен жабдықтаудың сенімділігі мен тиімділігін сақтай отырып, атмосфераға тарайтын зиянды заттардың көлемін азайту. Жоспарланған кешенді шараларды іске асыру шығарындыларды едәуір қысқартып, қоршаған ортаға түсетін теріс әсерді төмендетуге мүмкіндік береді.
Мамандардың есептеуінше, жоба толық аяқталғаннан кейін экологиялық жағдай айтарлықтай жақсарады. Мәселен, 2026 жылы шығарындылар көлемі 2,7 мың тоннаға дейін қысқарады. Ал 2022 жылы бұл көрсеткіш 37,3 мың тонна болған.
Осылайша жаңғырту жобасы айтарлықтай экологиялық нәтиже беріп, станция жұмысының заманауи халықаралық экологиялық стандарттарға сәйкестігін қамтамасыз етеді. Сонымен қатар қаланы энергиямен тұрақты қамтамасыз ету сақталады.