«Алатау» дәстүрлі өнер театры ұлы ақын, философ Абай Құнанбайұлының 180 жылдығы мен көрнекті сазгер Нұрғиса Тілендиевтің 100 жылдығына арналған бірқатар жаңа спектакльдер қоймақ, деп хабарлайды aqshamnews.kz
Сондай-ақ көптен күткен премьералардың бірі мәңгілік махаббаттың аңызға айналған тарихын баяндайтын «Естайдың Қорланы» музыкалық драмасы болмақ. Спектакльдердің премьерасы 2025 жылдың күзінде өтеді.
Биыл VIII маусымда театр репертуары төрт жаңа қойылыммен кеңейтілді: «Мамлюк. Сұлтан Бейбарыс», «ҚҰЛАН» экстраваганзасы, «Алатау FM радиосы» музыкалық комедиясы және қазақтың көрнекті композиторы, ақын, айтыс шебері Біржан Сала Қожағұлұлының әндеріне жазылған «Теміртас» реквиемі қойылды.
«Театрдың репертуарында қызықты саунддрамалар, жарқын экстраваганзалар, музыкалық комедиялар және тіпті реквиемдік спектакльдер бар. Бұл батыл эксперименттер біздің труппа үшін жаңа көкжиектер ашады және көрермендерге дәстүрлі театрдың шекарасын кеңейте отырып, бірегей театр тәжірибесіне енуге мүмкіндік береді. Айтпақшы, өткен жылы театр сахнасына 50-ден астам қойылым қойылып, қалың көрерменге жол тартып, бай мәдени бағдарлама жасауға мүмкіндік берді. 2024 жылы біздің қойылымдарды барлығы 62 мың адам тамашалады – бұл соңғы 3 жылдағы рекордтық көрсеткіш», - деді театр директоры Мақсат Нұралиев Өңірлік коммуникациялар қызметінің брифингінде.
«Алатау» театрының қойылымдары 20-дан астам ұлттық аспаптарда шебер ойнайтын «Алатау» этно-фольклорлық ансамблінің жанды дауыстағы өнерімен сүйемелденеді. Труппа құрамында «Алатау» би ансамблі, ақындар, дәстүрлі ән орындаушылар және сахнада шынайы, жанды халық мәдениетінің атмосферасын тудыратын талантты әртістер бар.