Қазақстанның Оқу-ағарту министрлігіне қарасты Балалардың құқықтарын қорғау комитеті мектеп оқушыларына бағытталған жаңа алаяқтық әрекеттер туралы ескертті, деп хабарлайды Аqshamnews.kz тілшісі.
Комитеттің мәліметінше, жаңа оқу жылы басталғалы бері белгісіз адамдар балаларға қоңырау шалып, өздерін мұғалім ретінде таныстырып, түрлі сылтаумен SMS арқылы келген құпия кодтарды сұраған.
"Олар "электрон күнделікті қайта шығару қажет" деген желеумен SMS кодтарын алдап сұрап алады. Балалар бұл әрекетті ата-анасына немесе мектепке көмектесу деп ойлап, шын мәнінде алаяқтарға мемлекеттік қызметтерге, онлайн-банкингке немесе туыстарының банк шоттарына кіруге мүмкіндік беріп отыр", - делінген комитет таратқан хабарламада.
Министрлік SMS арқылы келетін кодтар - тек жеке ақпарат екенін ескертіп, оларды ешкімге, тіпті мұғаліммін деген адамға да айтуға болмайтынын қатаң ескертеді.
Балаларға мына дүниелерді ескерту керек:
-
ешқандай жағдайда SMS-кодтарды ешкімге бермеу;
-
күмән туса, бірден ата-анасына хабарласып нақтылау;
-
күмәнді сілтемелерге өтпеу және бейтаныс қосымшаларды жүктемеу.
Ата-аналарға кеңес:
-
мұғалімдер мен мектеп қызметкерлері ешқашан SMS-кодтар немесе банк картасының деректерін сұрамайтынын балаға түсіндіру;
-
телефонға ата-аналық бақылау орнатып, бейтаныс нөмірлерден келген қоңырауларды қадағалау;
-
балаңызбен сенімді қарым-қатынас орнатып, ол мұндай жағдайлардан қорықпай хабарлай алатындай ету.
Күмәнді әрекеттер байқалса, полицияға немесе 111 байланыс орталығына хабарласу қажет.