Вице-министр денсаулық сақтау жүйесіндегі жалақы мәселесіне қатысты пікір білдірді, - деп хабарлайды Aqshamnews.kz тілшісі.
Денсаулық сақтау вице-министрі Тимур Мұратов әлеуметтік желіде патологоанатомның төмен жалақы жайлы жазбасына қатысты пікірін білдірді. Оның айтуынша, қазақстандық дәрігерлердің еңбекақысы расында да жеткіліксіз.
"Дәрігерлер аз алады. Әлемде клиникалық медицина ең жоғары ақы төленетін салалардың бірі. Бірақ елдегі қазіргі экономикалық жағдайды ескеруіміз керек. Өкінішке қарай, бұдан артық деңгейде қамтамасыз ете алмай отырмыз", – деді Мұратов Үкіметтегі брифингте.
Вице-министрдің айтуынша, ауруханалар мен емханалар ақысыз медициналық көмектің кепілді көлеміне кірмейтін және ӘМСҚ арқылы өтелмейтін қосымша ақылы қызметтер көрсету арқылы қосымша табыс таба алады.
"Мысалы, босанушы әйелдер нақты дәрігерді таңдауды қаласа, бұл – ақылы сервис. Түскен қаражат мекемеде қалмайды, қызметкерлерге дифференциалды төлем немесе сыйақы ретінде беріледі", – деп түсіндірді ол.
Сондай-ақ Мұратов дәрігерлердің айлық деңгейі міндетті медициналық сақтандыру жүйесіне тікелей тәуелді екенін атап өтті.
"Жұмыс беруші мен қызметкердің жарналары жоғары елдерде, мысалы, Оңтүстік Кореяда, дәрігерлердің жалақысы да айтарлықтай жоғары", – деді вице-министр.
Оның мәліметінше, Қазақстанда дәрігерлердің медиандық айлығы шамамен 400 мың теңге. Бұған дейін министр Ақмарал Әлназарова Үкімет отырысында дәл осындай дерек келтірген. Ал экс-министр Ажар Ғиният 2023 жылға қарай дәрігерлердің орташа жалақысы 550 мың теңгеге жетеді деп мәлімдеген еді.