Air Astana Еуропалық қайта құру және даму банкі (ЕҚДБ) мен Банк ЦентрКредит бірлесіп жүзеге асырып жатқан жеткізу тізбегін қаржыландыру бағдарламасына қатысуда. Бағдарлама аясында Air Astana жеткізушілері Қазақстанда алғашқылардың бірі болып ЕҚДБ қолдауымен кері факторинг тетігіне қол жеткізеді, – деп хабарлайды aqshamnews.kz тілшісі.
Бағдарлама, ең алдымен, Air Astana-ға кеңсе жабдықтарын, кейтеринг және техникалық қызмет көрсету сияқты тауарлар мен қызметтерді жеткізетін жергілікті шағын және орта бизнес өкілдерін қолдауға бағытталған. Бұл тетік жеткізушілерге шоттар бойынша төлемді мерзімінен бұрын, белгілі бір дисконтпен алуға мүмкіндік береді, соның нәтижесінде олардың ақша айналымы жақсарып, айналым қаражатын қаржыландырудың дәстүрлі құралдарына тәуелділігі азаяды.
Air Astana сатып алу үдерістерін жүйелі түрде жетілдіріп, Қазақстан бойынша жеткізушілермен өзара ынтымақтастықты нығайтып келеді. Өткен жылы компания тауарлар мен қызметтерді сатып алу ашықтығын арттыру мақсатында өз тендерлік порталын іске қосты. Сонымен қатар, 2023 жылдан бастап экологиялық, әлеуметтік және корпоративтік басқару (ESG) жағынан жоғары нәтижелер көрсеткен жеткізушілерді атап өтетін жыл сайынғы ESG сыйлығын табыстап келеді.