Абай облысының Ақсуат ауданында жоғалып кеткен 3 жастағы бала дер кезінде табылып, қайғылы жағдайдың алдын алу мүмкін болды, – деп хабарлайды aqshamnews.kz тілшісі. Бұл туралы Абай облысы ПД мәлімдеді.
Оқиға бүгін, 8 сәуірде болды. Бала үйдің ауласынан байқатпай шығып кетіп, із-түзсіз жоғалған. Таңертең ерте туыстары өз бетімен іздеуді бастап, шамамен сағат 11:00-де полицияға хабар берген.
Осыдан кейін іздеу жұмыстарына барлық қажетті күш жұмылдырылды. Полицейлер уақыттың әр минуты маңызды екенін ескеріп, далалық аумақты жіті тексерген.
Бірнеше сағаттан соң іздеу барысында атпен жүрген полиция қызметкері елді мекеннен алыс жерден жалғыз жүрген кішкентай баланы байқап қалған.
Сағат 14:00 шамасында бала ауылдан шамамен 3 шақырым жерден табылды. Абырой болғанда, оның өмірі мен денсаулығына қауіп төнбеген. Алдын ала мәлімет бойынша, бала адасып кеткен.
Осылайша, жедел ұйымдастырылған іздеу жұмыстарының нәтижесінде бүлдіршін аман-есен отбасына қайтарылды.