Алматыда Республика күніне орай ғылыми-практикалық конференция өтті, – деп хабарлайды aqshamnews.kz тілшісі.
Жиында Қазақстанның мемлекеттік егемендігі туралы декларацияның тарихи маңызы, тәуелсіз мемлекеттің қалыптасу кезеңдері және ел болашағын дамытудағы жас ұрпақтың рөлі талқыланды.
Конференция 21 қазанда Алматыдағы Достық үйінде өтті. Оған мемлекеттік органдардың өкілдері, ғалымдар, сарапшылар, қоғам қайраткерлері мен жастар қатысты.
Жиынның ашылуында Алматы қаласы әкімінің орынбасары Абзал Нүкенов құттықтау сөз сөйледі. Бұдан кейін ғалымдар, саясаттанушылар мен сарапшылар баяндама жасап, Қазақстанның егемендікке жетуіне негіз болған тарихи алғышарттарға, тәуелсіздіктің негізгі қағидаттары мен оның бүгінгі Қазақстан үшін маңызына тоқталды.
Философия, саясаттану және дінтану институтының бас директоры Айгүл Сәдуақасова тәуелсіздік - тарихи жетістік қана емес, әрбір азаматқа үлкен жауапкершілік жүктейтін құндылық екенін атап өтті.
«Егемендікке қол жеткізу - Қазақстанның алдында зор мүмкіндіктер ашқан аса маңызды саяси оқиға. Алайда тәуелсіздікті сақтау және нығайту да одан кем маңызды емес. Ол үшін тәуелсіздіктің қадірі туралы айтып қана қою жеткіліксіз. Әрбір азамат елдің дамуына нақты ісімен, қосқан үлесімен атсалысуы керек», - деді Айгүл Сәдуақасова.
Сарапшы конференцияның маңызды тұстарының бірі әр буын өкілдерінің өзара пікір алмасуы болғанын айтты. Жиынға қатысушылар Қазақстан мемлекеттілігінің қалыптасу кезеңіне қатысты тарихи оқиғалар жөніндегі ой-пікірлерімен бөлісті. Ал жастар аға буын өкілдерімен жүздесіп, елдің өткені мен болашағына қатысты мәселелерді талқылауға мүмкіндік алды.
«Бүгін мазмұнды баяндамалар тыңдалып, қызу пікір алмасу болды. Әсіресе, аға буын өкілдерінің өз естеліктері мен көзқарастарын жастармен бөліскені маңызды. Мұндай кездесулер жас ұрпақтың еліміздің жүріп өткен жолын тереңірек түсінуіне және тәуелсіздікті сақтаудың қаншалықты маңызды екенін ұғынуына көмектеседі», - деп атап өтті ол.
Айгүл Сәдуақасова халық бірлігі, ғылым мен білімнің дамуы, инновацияларды өркендету ел тәуелсіздігін нығайтуда айрықша рөл атқаратынын да атап өтті. Оның пікірінше, жастар тәуелсіздіктің қадірін түсініп қана қоймай, өз білімдері мен кәсіби біліктіліктерін ел игілігіне жаратып, Қазақстанның дамуына белсенді үлес қосуы қажет.
Сөз соңында сарапшы қазақстандықтарды келе жатқан Республика күнімен құттықтап, жас ұрпақ ел болашағына деген шынайы жауапкершілікті сезініп өседі деген сенімін білдірді.