Маңғыстау облысы бойынша ҚР Қаржылық мониторинг агенттігінің департаменті онлайн-казино арқылы заңсыз ойын бизнесін ұйымдастырды деген күдікпен Рантик Бахтияр Оглыға қатысты тергеу жүргізіп жатыр, – деп хабарлайды aqshamnews.kz тілшісі ҚМА баспасөз қызметіне сілтеме жасап.
Ведомство мәліметінше, платформаның жұмысы үшін bingo37.pro сервисі пайдаланылған. Онда мыңнан астам құмар ойын түрі, соның ішінде Crazy Monkey, Keno, Euro Game және басқа да ойындар ұсынылған.
Ойыншылар қалай тартылған?
Қатысушыларды тарту Telegram және WhatsApp мессенджерлері арқылы жүзеге асқан. Қолданушыларға жарнамалық хабарламалар, фото және бейнематериалдар, акциялар мен бонус бағдарламалары туралы ұсыныстар жіберіліп, «жеңіл әрі тез ұтыс» туралы жалған әсер қалыптастырылған. Ақша аударғаннан кейін ойыншыларға платформаға кіруге арналған логин мен құпиясөз берілген.
Түскен қаражатты қабылдау және қаржы ағындарын жасыру үшін күдікті Грузия мен Тәжікстан азаматтарын тартқан. Олар Қазақстан аумағында банк шоттары мен абоненттік нөмірлерді рәсімдеп, оларды іс жүзінде пайдаланбай, қолжетімділікті ұйымдастырушыға берген.
Осы шоттар арқылы 3,1 млрд теңгеден астам қаражат түскені айтылды.
Халықаралық іздеу және экстрадиция
2025 жылдың тамызында Рантик Бахтияр Оглы халықаралық іздеуге жарияланып, сот сырттай оған қатысты қамауда ұстау түріндегі бұлтартпау шарасын таңдаған.
Ал 2026 жылдың қаңтарында ол Грузияда ұсталып, әрі қарай тергеу жүргізу үшін Қазақстанға экстрадицияланған.
Мүлікті тәркілеу
Активтерді жасыру үшін үшінші тұлғалардың атына рәсімделген екі автокөлікті сотқа дейін тәркілеу бастамасы көтерілген:
Porsche Cayenne
Lexus GX 460
Сот қаулысымен аталған көліктер мемлекет кірісіне тәркіленді.
АФМ департаменті заңсыз ойын бизнесін ұйымдастыру фактісі бойынша қылмыстық істі тергеуді жалғастырып жатыр.