Тағамы керемет, ал адамдар өте мейірімді әрі ашық, деп хабарлайды aqshamnews.kz тілшісі.
Алматыда 20–23 тамыз аралығында тревел-блогерлерге, журналистерге, инфлюенсерлерге және туризм индустриясының мамандарына арналған ірі халықаралық алаңдардың бірі TBEX Asia 2026 өтіп жатыр. Қалаға әлемнің түкпір-түкпірінен 250-ден астам автор мен сала өкілі келді. Олардың жалпы аудиториясы шамамен 300 млн адамды қамтиды.
Бірнеше күн бойы Алматы жаһандық медиа алаңға айналып, Қазақстанды әлемнің түкпір-түкпіріндегі миллиондаған әлеуетті саяхатшыға тікелей таныстыруға мүмкіндік беріп отыр. TBEX-тің әр қатысушысы - шетелдік аудиториямен байланыс орнататын дербес ақпарат арнасы: Instagram, TikTok, YouTube, Facebook, Pinterest, Snapchat, блогтар, подкасттар және онлайн-БАҚ. Бүгін Алматыда жасалып жатқан контент форум күндері аяқталғаннан кейін де қала мен елдің танымалдығын арттыруға қызмет ете береді.
TBEX қатысушыларының арасында миллиондаған аудиториясы бар авторлар да бар. Америкалық тревел-блогер Christopher Reese Joondeph (Authentic Traveling) әлеуметтік желілерде 3 млн-нан астам оқырман жинаған. Филиппиндік тревел-инфлюенсер әрі YouTube-креатор Wil Dasovich-тің Instagram желісінде шамамен 1 млн оқырманы бар. Ал «XXI ғасырдың Ибн Баттутасы» атанған мысырлық саяхатшы әрі тележүргізуші Ahmed Haggag-тың Instagram-дағы аудиториясы 1,3 млн-нан асады.
Осылайша, Алматы бір ғана жарнамалық науқан арқылы емес, әр елдегі аудиториясына саяхат туралы әңгімелейтін жүздеген тәуелсіз автордың контенті арқылы қатар таныстырылып отыр.
Мұндай форматтың басты құндылығы – Алматыны саяхатшылардың өз көзімен көрсету мүмкіндігі. Қонақтар туристік нысандарды аралап қана қоймай, бағытын қалыптастырып, фото мен бейне түсіреді, жергілікті тұрғындармен тілдеседі, ұлттық асханамен танысады, таулы аймақтарды зерттеп, Қазақстан туралы әңгімелейді.
«Шынымды айтсам, Қазақстан туралы көп біле бермейтінмін. Бірақ әзірге алған әсерім өте жақсы. Тағамы керемет, ал адамдар өте мейірімді әрі ашық», – деді британдық тревел-блогер әрі экспедиция ұйымдастырушысы Уилл Хаттон.
22 және 23 тамызда Алматыда TBEX Asia 2026-ның негізгі іскерлік бағдарламасы өтеді. Оның аясында халықаралық сарапшылардың баяндамасы, тақырыптық сессия, туристік бағыттардың таныстырылымы, кәсіби кездесу мен нетворкинг ұйымдастырылады.
TBEX Asia 2026-ның Орталық Азияда алғаш рет өткізілуі – әлемдік туризм индустриясының өңірге және Қазақстанға деген қызығушылығының артып келе жатқанының көрсеткіші. Бүгінде Алматы туристер үшін тартымды бағыт қана емес, жаһандық travel-индустрияның да маңызды тоғысатын орталығына айналып келеді.