Таразда еңбек және зейнетақы заңнамасын сақтамау салдарынан 2515 азаматтың құқығы бұзылғаны анықталды, – деп хабарлайды aqshamnews.kz тілшісі.
Прокуратураның қадағалауынан кейін қорларға аударылмаған зейнетақы жарналары толық өтеліп, кінәлілер жауапқа тартылды.
Прокуратура мәліметінше, 2025 жылдың тамызы мен желтоқсаны аралығында «Жасыл Ел Тараз» ЖШС 650 қызметкері үшін Бірыңғай жинақтаушы зейнетақы қорына 20 млн теңгеден астам міндетті зейнетақы жарналарын аудармаған. Қадағалау актісінен соң бұзушылық жойылып, жарналар қорға толық төленген.
Осыған ұқсас заңбұзушылықтар Тараз қаласының білім бөліміне қарасты мемлекеттік мектепке дейінгі ұйымдарда да тіркелген. Мұнда 1895 қызметкерге қатысты 283 млн теңге көлеміндегі зейнетақы жарналары уақытында төленбеген.
Ведомствоның хабарлауынша, прокурорлық ықпал ету шаралары нәтижесінде жалпы сомасы 300 млн теңге зейнетақы жарналары толық өтеліп, қызметкерлердің құқықтары қалпына келтірілді. Кінәлі тұлғалар әкімшілік жауапкершілікке тартылған.