Ғылым және жоғары білім министрі Саясат Нұрбек 2027 жылы ҰБТ форматына өзгеріс енетінін айтты, – деп хабарлайды aqshamnews.kz тілшісі.
“Биыл ешқандай өзгеріс болмайды, бәрі алдын ала жарияланған кесте бойынша өтеді. Біз жоспармен жүріп келеміз. Екі сынақ тестілеуі өтіп кетті. Қазір бірінші негізгі ҰБТ басталады. Одан кейін екінші, үшінші және бесінші тестілеу тамыз айында ақылы негізде оқитындар үшін өтеді. Ал келесі жылдан бастап пилоттық режимде балама ретінде жаңа тест енгізіледі. Оның атауы AIT (Admission Insight Test). Сынақ тесті келесі жылы да сақталады. Себебі адамдар оны алып тастап, тек бір ғана ҰБТ қалады деп алаңдаған еді”, – деді Саясат Нұрбек.
Министрдің айтуынша, сынақ тесттері оқушылардың әлсіз тұстарын анықтауға жақсы көмектесті.
“Жаңа тесттің артықшылығы оны шетелдік университеттердің барлық филиалдары қабылдайды. Өйткені бұл ETS стандарты, сапа деңгейі өте жоғары. Олардың тесті қабылдау рәсімдерінде автоматты түрде танылады. Шетелдік университеттер де оны қабылдайды. Негізінде бұл тестті SAT, ACT, GRE деңгейінде, осы емтихандарды әзірлеген компаниямен бірлесіп жасап жатырмыз. Бұл жаңа форматқа үлкен артықшылық береді. Сонымен қатар барлық талапкерлер үшін балама ретінде ұсынылады”, – деді министр.