2026 жылы Қазақстанда 11 мың шақырымнан астам автомобиль жолын салу және жөндеу жоспарланып отыр. Көлік вице-министрі Мақсат Қалиақпаров басым жобалардың нақты учаскелерін атады, деп хабарлайды aqshamnews.kz.
Вице-министрдің айтуынша, келер жылы ірі магистральдарды салу мен қайта жаңғырту жұмыстары жалғасады. Соның ішінде Ұлытау облысы аумағындағы Қызылорда – Жезқазған автожолының 208 шақырымдық бөлігінде құрылыс-қайта құру жұмыстары тоқтамайды.
Сондай-ақ жалпы ұзындығы 896 шақырым болатын «Орталық – Батыс» жобасын іске асыру, әрі қарай Ақтөбе – Ұлғайсын (232 км) және Қарағанды – Жезқазған (572 км) бағыттарындағы жобаларды жүргізу көзделген.
Мақсат Қалиақпаров барлық қажетті техникалық-экономикалық негіздеме дайын екенін, қаржы қарастырылғанын және жұмыстар жоспарға сай атқарылып жатқанын мәлімдеді.
Қалаларды айналып өтетін жолдар
2026 жылы бірқатар елді мекенде айналма жолдар салу жоспарланған. Атап айтқанда, Сарыағаш, Қызылорда, Петропавл және Рудный қалаларының айналма бағыттары қолға алынады.
Туристік және шекара маңы маршруттары
Көлік министрлігі туристік және шекараға жақын жолдарды дамыту жұмыстарын да жалғастырады. Олардың қатарында Рахман қайнарына апаратын жол, сондай-ақ Петропавл – Ресей Федерациясының шекарасы бағыты бар.
2026 жылға жоспарланған күрделі және орташа жөндеу учаскелері
Жөндеу жұмыстары мына бағыттарда қарастырылған:
-
Жезқазған – Петропавл
-
Атырау – Орал
-
Жаңаөзен – Кендірлі
-
Мұқыр – Құлсары
-
Макинск – Ақсу – Торғай және өзге де учаскелер
Жергілікті жол желісі мен өзге жобалар
Жергілікті маңызы бар жолдар бойынша Ақтау – Форт-Шевченко, Түркістан – Шәуілдір, Чапай – Сайхын бағыттарын дамыту жоспарланған. Сонымен бірге Семей қаласындағы автогужевой көпірдің құрылысы да жалғасады.