دوستىق ۇيىندە اقمارال ارىستانبەكوۆانىڭ «Facets of diplomacy» (قازاقستان ديپلوماتياسىنىڭ قىرلارى) اتتى كىتابىنىڭ تۇساۋكەسەرى ءوتتى.
كورنەكتى قازاق ديپلوماتى، مەملەكەت جانە قوعام قايراتكەرى، قازاقستان رەسپۋبليكاسىنىڭ سىرتقى ىستەر ءمينيسترى، بۇۇ جانىنداعى قازاقستاننىڭ تۇڭعىش تۇراقتى وكىلى اقمارال حايدار قىزى ارىستانبەكوۆا قازاقستان ديپلوماتياسىنىڭ تاريحىنا قاتىستى جاڭا كىتابىن تانىستىردى. ءىس-شاراعا الماتىداعى بۇۇ وكىلدەرى مەن وزگە مەملەكەتتەردىڭ قازاقستانداعى ەلشىلەرى قاتىستى.
– بۇل كىتاپ – ءجاي عانا وقيعالار تىزبەگى ەمەس. بۇل – ەلدىڭ تاعدىرى شەشىلگەن، كۇردەلى دە تاريحي كەزەڭدەگى قازاقستاننىڭ حالىقارالىق بايلانىستارىنىڭ قالىپتاسۋى تۋرالى جازىلعان كوركەم-دەرەكتى شەجىرە. كىتاپتا 1980 جىلداردان باستاپ 1991 جىلدىڭ جەلتوقسانىندا تاۋەلسىزدىك جاريالانعانعا دەيىنگى ۋاقىت قامتىلعان، – دەدى ەرەكشە تاپسىرمالار جونىندەگى ەلشى – ق ر ءسىم الماتى قالاسى وكىلدىگىنىڭ باسشىسى جانىبەك ءابراشوۆ.
كىتاپتىڭ ءبىرىنشى ءبولىمى حالىقتىق ديپلوماتياعا ارنالعان. مۇندا اۆتور قازاقستاننىڭ وزگە ەلدەرمەن دوستىق جانە مادەني بايلانىستارى جايلى بىرەگەي قۇجات ماتەريالدارىمەن، فوتوسۋرەتتەرىمەن جانە ەستەلىكتەرىمەن بولىسەدى. بۇل ءبولىمنىڭ قۇندىلىعى – ماتەريالداردىڭ باسىم بولىگى اۆتوردىڭ جەكە مۇراعاتىنان الىنعان. كىتاپتىڭ ەكىنشى ءبولىمى قازاقستاننىڭ سىرتقى ىستەر مينيسترلىگىنىڭ تاۋەلسىزدىك جاريالانعانعا دەيىنگى كۇردەلى كەزەڭدەگى قىزمەتىنە ارنالعان. مۇندا ديپلوماتيالىق قۇرىلىمداردىڭ قالاي قالىپتاسقانى، قانداي قيىندىقتارمەن بەتپە-بەت كەلگەنى باياندالادى.