6 شىلدە – استانا كۇنى مەرەكەسىنە وراي قازاق حالقىنىڭ اڭىز-تاريحىنان باستاۋ الىپ، ءوز كەيىپكەرلەرىمەن بۇلدىرشىندەردىڭ سۇيىكتى تۋىندىسىنا اينالعان «ەر توستىك» ەرتەگىسىنىڭ پرەمەراسى ءوتتى.
«ەر توستىك» - قازاق ەرتەگىلەرىنىڭ ىشىندەگى ەڭ كونە ءارى باتىرلىق ۇلگىدەگى تۋىندىلاردىڭ ءبىرى. مۇندا قيال-عاجايىپ، باتىرلىق جىرى ەلەمەنتتەرى، تاريحي-ميفولوگيالىق كەيىپكەرلەر مەن وقيعالار كەزدەسەدى.
قىزىقتى ءارى قاتەرلى وقيعالاردان وتە وتىرىپ، ارمانىنا جەتەتىن توستىك باتىر مەن ونىڭ جولداستارى كولتاۋىسار، جەلاياق، شاپشاڭ، ساققۇلاق، شالقۇيرىق اتتى كەيىپكەرلەرمەن ءوربيتىن وقيعا كىشكەنتاي كورەرمەندەرىمىزدى ەرەكشە اسەرگە بولەيتىنى انىق. اتالعان كەيىپكەرلەر ارقىلى ومىردە دە ءاربىر قيىندىقتاردى وڭتايلى شەشۋگە كومەكتەسىپ، جانىنان تابىلاتىن دوستاردىڭ بولۋىنا دەگەن ارمانعا باعىتتالادى.
قۋىرشاق تىلىندە سويلەپ، تەاتر ساحناسىنا شىعاتىن كەيىپكەرلەر وزدەرىنە ساي مىنەز ەرەكشەلىكتەرىن تاۋىپ، بالالاردى عاجايىپتار الەمىنە كۋاگەر ەتەدى. ەرتەگىلەر پاتشالىعى سانالاتىن قۋىرشاق تەاترىنداعى جاڭا پرەمەرا بۇلدىرشىندەردى تارتىمدى اۋەن، قىزىقتى ءارى قۇبىلمالى وقيعا ارقىلى ءوز سىرىنا باۋراپ الىپ، سابيلەرگە مەرەكەلىك كوڭىل-كۇي سىيلادى.