مەملەكەتتەگى تۇراقسىز ەپيدەميولوگيالىق احۋالدىڭ اسەرى ەسكەرىلدى.
ۇلتتىق بانك بازالىق مولشەرلەمەنى 9،25%-عا دەيىن كوتەردى، دەپ حابارلايدى Almaty-akshamy.kz.
«قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى جونىندەگى كوميتەتى بازالىق مولشەرلەمەنى جىلدىق 9،25% دەڭگەيىندە +/- 1،00 پ.ت. پايىزدىق دالىزبەن بەلگىلەۋ تۋرالى شەشىم قابىلدادى. تيىسىنشە وتىمدىلىكتى ۇسىنۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 10،25%، ال وتىمدىلىكتى الۋ جونىندەگى تۇراقتى قولجەتىمدى وپەراسيالار بويىنشا مولشەرلەمە – 8،25% بولادى»، – دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.
اقشا-كرەديت ساياساتىن ويلاستىرىلعان تۇردە كۇشەيتۋ ينفلياسيالىق ءسپيرالدى بوساتۋ ءقاۋپىنىڭ الدىن الا ءبىلۋ جانە 2022 جىلى ينفلياسيانى 4-6% نىسانالى دالىزگە قايتارۋ قاجەتتىگىنەن تۋىندادى.
بۇل رەتتە ىسكەرلىك بەلسەندىلىكتىڭ قالپىنا كەلۋىنە الەمدەگى، اتاپ ايتقاندا، قازاقستانداعى تۇراقسىز ەپيدەميولوگيالىق احۋالدىڭ اسەرى ەسكەرىلدى.
مولشەرلەمەنىڭ ارتۋى تەڭگەلىك اكتيۆتەردىڭ تارتىمدىلىعىن قولدايدى، بۇل جاعىمسىز تەپە-تەڭدىكتى بولدىرمايتىن كۇتۋلەردى قالىپتاستىرۋ ماقساتىندا ۆاليۋتا مەن اقشا نارىقتارىندا باعا بەلگىلەۋدىڭ تيىمدىلىگىن ارتتىرادى.
شەشىم سۇرانىس تاراپىنان ەكونوميكاداعى ۇسىنىس پەن تۇراقتى پروينفلياسيالىق قىسىم ارقىلى تۋىنداعان ينفلياسيالىق تاۋەكەلدەرگە نەگىزدەلگەن. ينفلياسيا بولجامداردان جوعارى قالىپتاسادى، ال باعانىڭ ودان ءارى وسۋىنە قاتىستى كۇتۋلەر جوعارى جانە بەكىتىلمەگەن بولىپ قالۋدا. ەكونوميكالىق ءوسىم مەن تۇتىنۋشىلىق بەلسەندىلىك قارقىنىنىڭ تەز قالپىنا كەلۋى ايتارلىقتاي فيسكالدى يمپۋلسپەن پروينفلياسيالىق ءۇردىستى قالىپتاستىرادى.
سونىمەن بىرگە جالپى الەمدىك دەڭگەيدە ازىق-تۇلىك باعاسى كوتەرىلىپ جاتقان شاقتا ازىق-تۇلىك تاۋارلارىنىڭ جەكەلەگەن توپتارىنا باعانىڭ ءوسۋى سەكىلدى ەلەۋلى فاكتورلار، جەتكىزۋ تىزبەگىندەگى ىركىلىستەر، شيكىزات پەن ماتەريالدار باعاسىنىڭ ۇلعايۋى كەزىندە وندىرۋشىلەر باعاسىنىڭ ءوسۋى، سونداي-اق رەتتەلەتىن باعالاردىڭ ساقتالىپ وتىرعان ءوسۋ الەۋەتى ۇسىنىس جاعىندا شوعىرلانعان. اقشا-كرەديت ساياساتىنداعى ترانسميسسيالىق تەتىكتىڭ ۇسىنىستىڭ كۇتىلمەگەن وزگەرىسىنە ىقپالى شەكتەۋلى بولاتىنىن، ال ينفلياسيانىڭ بۇل وزگەرىستەرگە بەيىم كەلەتىنىن حالىقارالىق تاجىريبەنىڭ ءوزى كورسەتىپ وتىر. وسى تاجىريبەنى نەگىزگە الا وتىرىپ، ۇلتتىق بانك ءوز شەشىمىمەن جوعارى ينفلياسيالىق كۇتۋلەرگە بايلانىستى سۇرانىس تاراپىنان بولاتىن تاۋەكەلدەرگە بارىنشا دەن قويادى.