كورپوراتيۆتىك تابىس سالىعى (كتس) – قازاقستان بيۋدجەتىنىڭ نەگىزگى كىرىس كوزىنىڭ ءبىرى بولىپ قالا بەرەدى. جاڭا سالىق كودەكسى اياسىندا بۇل سالىقتى ەسەپتەۋ مەن تولەۋ تارتىبىنە ماڭىزدى وزگەرىستەر ەنبەك. اتاپ ايتقاندا، ەكونوميكانىڭ جەكەلەگەن سالالارىنىڭ ەرەكشەلىگىن ەسكەرە وتىرىپ، سارالانعان مولشەرلەمەلەر قاراستىرىلعان. وڭىرلىك كوممۋنيكاسيالار قىزمەتى ۇيىمداستىرعان بريفينگتە الماتىداعى مەملەكەتتىك كىرىستەر دەپارتامەنتىنىڭ كامەرالدىق باقىلاۋ باسقارماسى كامەرالدىق مونيتورينگ ءبولىمىنىڭ باسشىسى دانيار تالعات وسىلاي دەپ مالىمدەدى.
كورپوراتيۆتىك تابىس سالىعىنىڭ بازالىق مولشەرلەمەسى سالىق سالىناتىن تابىستىڭ 20%-ى دەڭگەيىندە قالدى. الايدا كەيبىر قىزمەت تۇرىنە باسقا مولشەرلەمە بەلگىلەنگەن. مىسالى، بانك قىزمەتى (بيزنەسكە نەسيە بەرۋدى قوسپاعاندا) مەن قۇمار ويىنى بيزنەسىنىڭ مولشەرلەمەسى 25% دەڭگەيىندە بولماق. الەۋمەتتىك سالا، سونىڭ ىشىندە ءبىلىم بەرۋ مەن مەديسينا سالاسى ءۇشىن 2026 جىلى – 5%، 2027 جىلدىڭ 1 قاڭتارىنان باستاپ 10% تومەندەتىلگەن مولشەرلەمە قاراستىرىلعان.
اگرارلىق سەكتورعا ەرەكشە نازار اۋدارىلعان. اۋىل شارۋاشىلىعىن قولداۋ مەن دامىتۋ ماقساتىندا اۋىل شارۋاشىلىعى ءونىمىن وندىرۋشىلەر ءۇشىن كتس مولشەرلەمەسى 3% دەڭگەيىنە دەيىن تومەندەتىلىپ، اۋىل شارۋاشىلىعى كووپەراتيۆتەرى ءۇشىن بۇل كورسەتكىش 6% بولىپ بەلگىلەندى. بۇل قادام ەلدىڭ ازىق-تۇلىك قاۋىپسىزدىگىن قامتاماسىز ەتۋدە ماڭىزدى ءرول اتقاراتىن وسى سالانىڭ ءوسىپ-ونۋىن ىنتالاندىرۋعا باعىتتالىپ وتىر.
سونىمەن قاتار، كورپوراتيۆتىك تابىس سالىعى ءبولىمىنىڭ قۇرىلىمى وزگەرتىلدى، بۇل ءاربىر ناقتى قىزمەت ءتۇرى مەن شەگەرىمدەر بويىنشا ءتيىستى نورمالاردى قولدانۋعا مۇمكىندىك بەرەدى. قازاقستان رەسپۋبليكاسىنىڭ رەزيدەنت-زاڭدى تۇلعالارى، سونداي-اق تۇراقتى مەكەمە ارقىلى نەمەسە ەل ىشىندەگى كوزدەردەن تابىس الاتىن بەيرەزيدەنتتەر سالىق تولەيتىندەر قاتارىندا قالادى. بۇرىنعىشا مەملەكەتتىك مەكەمەلەر كتس تولەۋشىلەر قاتارىنا كىرمەيدى، مەملەكەتتىك ورتا ءبىلىم بەرۋ ۇيىمدارى بۇل ساناتتان الىنىپ تاستالدى.
«جاڭا سالىق سالۋ جۇيەسى جەكەلەگەن سالالاردىڭ ەرەكشەلىگىن ەسكەرەدى. الەۋمەتتىك ماڭىزى بار جانە اۋىل شارۋاشىلىعى ءوندىرىسى سالالارى ءۇشىن تومەندەتىلگەن مولشەرلەمەلەر، ال جوعارى تابىستى قىزمەت تۇرلەرى ءۇشىن جوعارى مولشەرلەمەلەر ەنگىزىلىپ وتىر»، – دەپ اتاپ ءوتتى دانيار تالعات.