بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن پالاتا بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى، دەپ حابارلايدى almaty-akshamy.kz
بيۋرو وتىرىسىندا دەپۋتاتتار قاراۋىنا قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى جانە وعان ىلەسپە زاڭ جوبالارى ءبىرىنشى وقىلىمدا ۇسىنىلادى.
ادام قۇقىقتارى جونىندەگى ۋاكىل قىزمەتىنىڭ ماسەلەلەرى بويىنشا اكىمشىلىك قۇقىق بۇزۋشىلىق تۋرالى جانە سالىق كودەكستەرىنە وزگەرىستەر مەن تولىقتىرۋلار ەنگىزۋ كوزدەلىپ وتىر. كۇن ءتارتىبىنىڭ جوباسىندا جانۋارلارعا جاۋاپكەرشىلىكپەن قاراۋ تۋرالى زاڭ جوباسىن ءبىرىنشى وقىلىمدا ىلەسپە تۇزەتۋلەرىمەن قاراۋ قاراستىرىلعان.
سونداي-اق، ءبىرىنشى وقىلىمدا اكىمشىلىك قۇقىق بۇزۋشىلىق تۋرالى كودەكسكە جانۋارلارعا جاۋاپكەرشىلىكپەن قاراۋ ماسەلەلەرى بويىنشا تۇزەتۋلەر ەنگىزۋ تۋرالى جوسپارلانعان.
وسى زاڭ جوباسىنىڭ نەگىزگى مىندەتتەرى - جانۋارلارعا قاراۋ كەزىندە جالپى جانە ارنايى تالاپتار بەلگىلەۋ، جانۋارلاردى قاتىگەز قاراۋدان، ازاپ پەن قىرىلۋدان قورعاۋ، جانۋارلاردى قاتىگەزدىكپەن ولتىرۋگە جول بەرمەۋ، قوعامنىڭ ادامگەرشىلىگى مەن ىزگىلىگىن نىعايتۋ، قاڭعىباس جانۋارلاردىڭ سانىن رەتتەۋ سالاسىنداعى اقپاراتتىڭ قاۋىپسىزدىگىن، اشىقتىعىن، ازاماتتاردىڭ وزگە دە قۇقىقتارى مەن زاڭدى مۇددەلەرىن قامتاماسىز ەتۋ بولىپ تابىلادى.