كايدزەن جۇيەسى – جاپونيادا كەڭىنەن تانىلعان، ۇنەمى جەتىلدىرۋ مەن تيىمدىلىكتى ارتتىرۋعا باعىتتالعان باسقارۋ فيلوسوفياسى. ونىڭ ىشىندە كانبان ءادىسى -وندىرىستەگى جۇمىس پروسەستەرىن وڭتايلاندىرۋعا، ۋاقىت پەن رەسۋرستاردى ءتيىمدى پايدالانۋعا مۇمكىندىك بەرەتىن قۇرال. بۇل ءادىس وندىرىستىك كاسىپورىنداردا، IT سالاسىندا جانە ءبىلىم بەرۋ جۇيەسىندە كەڭىنەن قولدانىلادى.
مەن 2023 جىلى برازيليا ەلىندە تاجىريبەلىك تاعىلىمدامادان ءوتىپ، الەمدىك دەڭگەيدەگى ءوندىرىس ورىندارىندا قولدانىلاتىن كايدزەن جۇيەسىنىڭ كانبان ءادىسىن تەرەڭىرەك مەڭگەرىپ قايتتىم. تاعىلىمداما بارىسىندا جەرگىلىكتى زاۋىتتاردا، كاسىپورىنداردا وسى ءادىستىڭ قالاي جۇزەگە اسىرىلاتىنىن ءوز كوزىممەن كورىپ، تاجىريبەدەن ءوتتىم.
ءىس ساپاردان كەلگەننەن كەيىن، كوللەدج باسشىلىعىمەن بىرلەسىپ، كانبان ءادىسىن وقۋ پروسەسىنە بەيىمدەۋدىڭ جولدارىن قاراستىردىق. ناتيجەسىندە، ستۋدەنتتەر وندىرىستىك تاپسىرمالاردى ورىنداۋ بارىسىندا ۆيزۋالدى باسقارۋ جۇيەسىن قولدانىپ، جۇمىس پروسەستەرىن ءتيىمدى ۇيىمداستىرۋعا مۇمكىندىك الدى. بۇل ءتاسىل ءبىلىم الۋشىلارعا تاپسىرمالاردى جۇيەلەپ ورىنداۋعا، ۋاقىتتى ءتيىمدى پايدالانۋعا جانە كوماندالىق جۇمىستى جاقسارتۋعا كومەكتەسەدى.
ءبىزدىڭ الماتى ەلەكترومەحانيكا كوللەدجىندە كايدزەن جۇيەسى ادىستەرى بۇرىننان دا ءىشنارا قولدانىلىپ كەلەدى. بۇل جۇيەنىڭ كوللەدجدە نەگىزىن قالاۋعا العاش ۇسىنىس ءبىلدىرىپ، باستاما كوتەرگەن «توو Janser HR academy» ديرەكتورى، Executive MBA، PhD دوكتورى، پروفەسسور، قازاقستان رەسپۋبليكاسىنىڭ ەڭبەك سىڭىرگەن ەنەرگەتيگى قوجابايەۆ حايرۋللا ءبايدىلدا ۇلى بولاتىن. ول كايدزەن جۇيەسى تاقىرىبىندا ءبىزدىڭ كوللەدجدە ارنايى سەمينار وتكىزىپ، وقىتۋشىلار مەن ستۋدەنتتەرگە ۇزدىك تاجىريبەلەردى تانىستىردى. كوللەدج باسشىلىعى مەن قوجابايەۆ حايرۋللا ءبايدىلدا ۇلىنىڭ قولداۋىمەن وقىتۋشىلار اراسىندا دا كايدزەن جۇيەسىنىڭ نەگىزگى قاعيداتتارىن ناسيحاتتاۋ جالعاسۋدا.
جالپى، كانبان ءادىسى- جوبالاردى باسقارۋ جانە وندىرىستىك پروسەستەردى وڭتايلاندىرۋعا ارنالعان جۇيە. بۇل ءادىس جۇمىس اعىنىن رەتتەپ، ونىمدىلىكتى ارتتىرۋعا ءتيىمدى كومەكتەسەدى. كانبان جۇيەسىنىڭ ءتورت نەگىزگى قاعيداسى بار، ولاردى قولدانۋ ارقىلى جۇمىس پروسەسىن ءتيىمدى ۇيىمداستىرۋعا بولاتىنىنا كوزىم جەتتى.
كانبان جۇيەسىنىڭ ءتورت قاعيداسىنا توقتالار بولسام، ولار:
1.تاقتادا تاپسىرمالاردى كورسەتۋ؛
2. ورىندالۋداعى جۇمىستى شەكتەۋ؛
3. تاپسىرمالاردىڭ تۇراقتى قوزعالۋىن قامتاماسىز ەتۋ؛
4. جۇمىس پروسەسىنىڭ ەرەجەلەرىن انىقتاۋ.
ءدال قازىرگى تاڭدا، وسى ادىسپەن شەبەرحانا جۇمىستارىن جۇيەگە كەلتىرىپ، وقۋ ۇدەرىسىنە ەنگىزۋ ارقىلى ستۋدەنتتەردىڭ تاجىريبەلىك ءبىلىمىن جەتىلدىرىپ، وندىرىستىك داعدىلارىن دامىتۋعا ات سالىسۋدامىن. بولاشاقتا بۇل ءادىستىڭ وقۋ پروسەسىنە تولىقتاي ەنگىزىلىپ، كوللەدج ءبىلىم الۋشىلارىنىڭ ەڭبەك نارىعىندا باسەكەگە قابىلەتتىلىگىن ارتتىرۋعا ىقپال ەتەتىنىنە سەنىمدىمىن. بۇل جاڭاشىلدىقتى الماتى ەلەكترومەحانيكا كوللەدجىندە عانا قولدانىپ قويماي، قالا دەڭگەيىندە تەحنيكالىق جانە كاسىپتىك ءبىلىم بەرۋ ۇيىمدارىنا دا تاراتىپ، ءوز تاجىريبەمىزبەن بولىستىك. وسى جۇيەنى ءتيىمدى جۇرگىزۋ ناتيجەسىندە الداعى ۋاقىتتا ءوز سالامىزدا ۇلكەن جەتىستىكتەرگە جەتەتىنىمىز ايقىن.
بەيسەن سەرىك بەرىك ۇلى
الماتى ەلەكترومەحانيكا كوللەدجىنىڭ
وندىرىستىك وقىتۋ شەبەرى