ەلىمىزدىڭ ءار ايماعىندا اكىمدىك گرانتىنا ءوتىنىم قابىلداۋ باستالدى، دەپ حابارلايدى aqshamnews.kz
ءار ايماق قاجەتتىلىگىنە قاراي تەك كەرەك ماماندىق بويىنشا كونكۋرس جاريالادى. بيىلعى بولىنگەن نىسانالى گرانت سانى – 1729. بۇل بىلتىرمەن سالىستىرعاندا ءبىر جارىم ەسە از.
الماتى قالاسى مەن پاۆلودار، قىزىلوردا، سولتۇستىك قازاقستان جانە ۇلىتاۋ وبلىستارى بۇل باستامادان قالىس قالدى. استانا قالاسى اكىمدىگى 526 گرانت ءبولىپ وتىر. ەڭ ازى قوستاناي وبلىسىندا.
كونكۋرسقا قاتىسۋ ءۇشىن ۇمىتكەر جوعارى وقۋ ورىندارىنىڭ قابىلداۋ كوميسسياسىنا ءوتىنىش بەرۋى قاجەت. سۇرالاتىن قۇجات ءتىزىمى: اتتەستات، ۇبت سەرتيفيكاتى، ءتولقۇجاتتىڭ كوشىرمەسى.
ەگەر جەڭىلدىك ساناتىنا جاتاتىن بولسا، راستايتىن قۇجاتتار تالاپ ەتىلەدى. قۇجات قابىلداۋ مەرزىمى ءار ۋنيۆەرسيتەتتە ءارتۇرلى بولۋى مۇمكىن. قوسىمشا اقپاراتتى اكىمدىك سايتىنان قاراۋعا بولادى. تاعى ءبىر قوسا كەتەتىن اقپارات، اكىمدىك گرانتى – نىسانالى بولعاندىقتان، تۇلەك وقۋىن اياقتاعان سوڭ سول وڭىرگە بارىپ، 3 جىل جۇمىس ىستەۋگە مىندەتتى.
رەكتور گرانتى دەگەن دە بار. ول بەلسەندى، وقۋ ۇلگەرىمى جاقسى، الەۋمەتتىك وسال توپتاعى وتباسىنان شىققان تالاپكەرلەرگە وقۋ ورىندارى تاراپىنان بەرىلەدى. بيىل مۇنداي گرانت سانى ەكى مىڭنان اسادى.
بۇدان بولەك، جۇمىس بەرۋشى مەن جوعارى وقۋ ورنى اراسىندا جاسالعان كەلىسىم نەگىزىندە جۇمىس بەرۋشىلەر دە ارنايى گرانت بولەدى.
سونداي-اق "قازاقستان حالقىنا" قوعامدىق قورى 500 گرانت ۇسىنىپ وتىر. ءوتىنىم 17 تامىزعا دەيىن قابىلدانادى. گرانت يەگەرلەرىنىڭ ءتىزىمى 11 قىركۇيەككە دەيىن جاريالانادى.
تەگىن وقۋ مۇمكىندىگىن ۇسىنىپ وتىرعانداردىڭ ىشىندە بىرنەشە جەتەكشى كومپانيا بار. بۇدان بولەك، كەيبىر تالاپكەرلەر گرانتتان باس تارتۋى مۇمكىن. وسى كەزدە مۇمكىندىك كەلەسى جوعارى بالل جيناعان تالاپكەرگە بەرىلەدى. ونىڭ ناتيجەسى قىركۇيەك-قازان ايىندا بەلگىلى بولادى. مۇنداي مۇمكىندىك اقىلى بولىمدە وقيتىن، ۇلگەرىمى جاقسى ستۋدەنتكە دە بەرىلمەك.