بۇگىن – پسيحولوگتاردىڭ كاسىبي مەرەكەسى. بۇل كۇن ادام جانىنىڭ ساۋلىعىن ساقتاۋعا، قوعامداعى رۋحاني تۇراقتىلىقتى نىعايتۋعا ۇلەس قوسىپ جۇرگەن مامانداردىڭ ەڭبەگىن باعالاۋعا ارنالعان. اتالعان سالا وكىلدەرىمەن قاتار، اسكەري ورتادا قىزمەت ەتەتىن پسيحولوگتاردىڭ ءرولى دە ەرەكشە. ولار جەكە قۇرامنىڭ مورالدىق-پسيحولوگيالىق احۋالىن قامتاماسىز ەتىپ، قىزمەتتىك مىندەتتەردىڭ ساپالى ورىندالۋىنا ىقپال ەتەدى.
ۇلتتىق ۇلاننىڭ «وڭتۇستىك» وڭىرلىك قولباسشىلىعىندا قىزمەت اتقاراتىن پودپولكوۆنيك الميرا قۇرمانالييەۆا – وسى باعىتتاعى كاسىبي مامانداردىڭ ءبىرى. ول جيىرما جىلدان استام ۋاقىت بويى اسكەري قىزمەتتە ءجۇرىپ، پسيحولوگيالىق قامتاماسىز ەتۋ سالاسىندا مول تاجىريبە جيناقتاعان وفيسەر.
اسكەردەگى پسيحولوگتىڭ قىزمەتى جەكە قۇرامنىڭ مورالدىق-پسيحولوگيالىق تۇراقتىلىعىن ساقتاۋعا، ۇجىمداعى ءوزارا سەنىمدى نىعايتۋعا جانە اسكەري قىزمەتشىلەردىڭ سترەسكە توزىمدىلىگىن ارتتىرۋعا باعىتتالعان. جۇيەلى تۇردە جۇرگىزىلەتىن پسيحولوگيالىق جۇمىستار جاۋىنگەرلىك دايارلىقتىڭ دەڭگەيىنە جانە قىزمەتتىك مىندەتتەردىڭ ءتيىمدى ورىندالۋىنا تىكەلەي اسەر ەتەدى.
ءوز قىزمەتى تۋرالى الميرا بىرلىك قىزى:
"ءبىزدىڭ نەگىزگى مىندەتىمىز – اسكەري قىزمەتشىلەردىڭ پسيحولوگيالىق دايىندىعىن ارتتىرۋ، سترەسكە توزىمدىلىگىن قالىپتاستىرۋ، قيىن جاعدايدا دۇرىس شەشىم قابىلداۋ قابىلەتىن دامىتۋ. جەكە اڭگىمەلەر مەن توپتىق ترەنينگتەر ارقىلى ەموسيونالدىق جاعدايدى باقىلاپ، پسيحولوگيالىق قولداۋ كورسەتەمىز. سونىمەن قاتار، جاۋىنگەرلىك قىزمەتتەن كەيىنگى بەيىمدەلۋ، وڭالتۋ جۇمىستارى مەن وتباسى ماسەلەلەرى بويىنشا كەڭەس بەرۋ دە قىزمەتىمىزدىڭ ماڭىزدى بولىگى. اسكەردە ءتارتىپ پەن جاۋاپكەرشىلىك ءبىرىنشى ورىندا، ال ۇلتتىق ۇلاندا قىزمەت ەتۋ – مەن ءۇشىن ۇلكەن مارتەبە"، – دەيدى ول.
الميرا قۇرمانالييەۆا اسكەري قىزمەت جولىن 22 جاسىندا باستاعان. العاشىندا 7552 اسكەري بولىمىندە اۋدارماشى بولىپ ەڭبەك ەتىپ، كەيىن الماتى قۇراماسىنىڭ باسقارماسىنا مەملەكەتتىك ءتىلدى ەنگىزۋ جونىندەگى مامان رەتىندە اۋىستىرىلدى. قىزمەتىن جالعاستىرا ءجۇرىپ، قازاق مەملەكەتتىك قىزدار پەداگوگيكالىق ينستيتۋتىندا پسيحولوگيا ماماندىعى بويىنشا ەكىنشى جوعارى ءبىلىم الدى. اسكەري پسيحولوگيا سالاسى ەندى قالىپتاسىپ جاتقان كەزەڭدە ول جاڭا باعىتتاعى قىزمەتتى ۇلكەن جاۋاپكەرشىلىكپەن يگەرىپ، كاسىبي تۇرعىدا قالىپتاستى.
بۇگىندە پودپولكوۆنيك الميرا قۇرمانالييەۆا ءوزىنىڭ لاۋازىمدىق مىندەتتەرىن ادال اتقارىپ، جەكە قۇرامنىڭ پسيحولوگيالىق تۇراقتىلىعىن قامتاماسىز ەتۋگە تۇراقتى ۇلەس قوسىپ كەلەدى. ونىڭ قىزمەت جولى كاسىبيلىككە، جاۋاپكەرشىلىككە جانە اسكەري بورىشقا ادالدىققا نەگىزدەلگەن.