33 جاستاعى اسەل قۋانىشبايەۆانىڭ تۋىستارى قوستانايداعى جەكە كلينيكادا بولعان جاعدايعا قاتىستى تەرگەۋ جۇرگىزۋدى تالاپ ەتىپ وتىر. ولاردىڭ ايتۋىنشا، ارتىق مايدى الىپ تاستاۋ وپەراسياسىنان كەيىن اسەل جانساقتاۋ بولىمىنە تۇسكەن. ايەل وبلىستىق اۋرۋحاناعا سەپسيس، ءىرىڭدى پەريتونيت، پنيەۆمونيا جانە اۋىر دارەجەلى انەميا دياگنوزدارىمەن شۇعىل جەتكىزىلگەن. ونىڭ اعزالارى جۇمىس ىستەمەي قالعان، - دەپ جازادى اqshamnews.kz ءتىلشىسى “نگ” ماتەريالدارىنا سىلتەمە جاساپ.
اسەلدىڭ اناسى گۇلجان ەسمۇراتوۆانىڭ ايتۋىنشا، قىزى اجىراسقاننان كەيىن كەيىن ءوز كەلبەتىن وزگەرتكىسى كەلگەن. قۇربىسى دەنە ءپىشىنىن ءساتتى وزگەرتكەننەن كەيىن، اسەل دە ليپوساكسيا جاساۋعا شەشىم قابىلداپ، قوستانايداعى سول جەكە كلينيكاعا جۇگىنگەن.
4 شىلدەدە اسەلگە اينالمالى ليپوساكسيا جاسالعان. اناسىنىڭ سوزىنشە، وپەراسيادان كەيىن-اق قىزى ءىشىنىڭ قاتتى اۋىراتىنىن ايتىپ شاعىمدانا باستاعان. الايدا كلينيكا دارىگەرلەرى بۇل قالىپتى جاعداي دەپ، اۋىرسىنۋدى باساتىن دارىلەر جازىپ بەرگەن. ءۇشىنشى كۇنى اسەل ۇيىنە شىعارىلعان، ءبىراق ونىڭ جاعدايى كۇرت ناشارلاعان. جەدەل جاردەم شاقىرىلىپ، ايەل شۇعىل تۇردە اۋرۋحاناعا جەتكىزىلگەن. قالالىق اۋرۋحانادا وعان ءۇش شۇعىل وپەراسيا جاسالعان.
گۇلجان ەسمۇراتوۆانىڭ ايتۋىنشا، اۋرۋحاناعا تۇسكەن كەزدە دارىگەرلەر سەپسيس، مىقىن ىشەگىنىڭ تەسىلۋى، جايىلعان ءىرىڭدى-فيبروزدى پەريتونيت، تەرمينالدىق فازا، اينالمالى ليپوساكسيادان كەيىنگى جاعداي، پنيەۆمونيا، اۋىر دارەجەلى سوزىلمالى انەميا جانە كوپ اعزالىق جەتكىلىكسىزدىك دەگەن دياگنوز قويعان.
قوستاناي قالالىق اۋرۋحاناسىنىڭ مالىمەتىنشە، جەكە كلينيكادا جاسالعان وپەراسيا بارىسىندا ىشەك تەسىلگەن – بۇل وتە سيرەك ءارى ومىرگە ءقاۋىپ توندىرەتىن اسقىنۋ. جەرگىلىكتى دارىگەرلەر الماتىداعى ۇلتتىق عىلىمي حيرۋرگيا ورتالىعىمەن تەلەمەديسينا ارقىلى كەڭەس جۇرگىزۋگە ءماجبۇر بولعان.
"شۇعىل وپەراسيا اۋىر ءوتتى، ءبىراق تولىق كولەمدە جاسالدى. حيرۋرگيالىق ارالاسۋ دۇرىس بولعانىن ماماندار راستادى جانە ءارى قاراي ەمدەۋگە قاتىستى ۇسىنىستار بەرىلدى، ولاردىڭ بارلىعى ورىندالدى"، – دەدى قوستاناي قالالىق اۋرۋحاناسى باس دارىگەرىنىڭ مىندەتىن اتقارۋشى قۋات الماعامبەتوۆ.
ونىڭ ايتۋىنشا، اسەل ءقازىر دە جانساقتاۋ بولىمىندە جاتىر، ءبىراق جاساندى تىنىس الۋ اپپاراتىنا قوسىلماعان، ەسىن بىلەدى، ءوزى تىنىس الىپ، تاماقتانادى. جاعدايى جاقسارىپ كەلەدى.
اسەلدىڭ اناسى وپەراسيا جاساعان كلينيكا ءوز كىناسىن مويىنداماي وتىرعانىن ايتتى. دەگەنمەن ولار مورالدىق وتەماقى رەتىندە اقشا ۇسىنعان، ءبىراق بۇل ءۇشىن پاسيەنت تاراپىنان ەشقانداي تالاپ قويمايتىنى جونىندە قولحات جازۋ شارتىن قويعان. وتباسى مۇنداي ۇسىنىستان باس تارتقان.
"ادۆوكات جالدادىم. ەندى پوليسياعا، پروكۋراتۋراعا جۇگىنەمىز. ءادىل تەرگەۋگە ۇمىتتەنەمىز"، – دەيدى زارداپ شەككەن ايەلدىڭ اناسى.
جەكە كلينيكا وكىلدەرى بۇل جاعدايعا قاتىستى كەيىن پىكىر بىلدىرەتىنىن ايتقان.