23 مامىر كۇنى بوستاندىق اۋدانىنىڭ №70 جالپى ءبىلىم بەرەتىن مەكتەبىندە «بالالار قاۋىپسىزدىگى – باستى نازاردا!» اتتى ينتەراكتيۆتى كۆەست ءوتتى.
6 «ءا» سىنىپ وقۋشىلارى، سونداي-اق «جاس ساقشى» جاساعىنىڭ مۇشەلەرى ءبىر كۇنگە ءتارتىپ ساقشىسىنىڭ ءرولىن سومداپ كوردى، دەپ حابارلايدى aqshamnews.kz.
كۆەست بارىسىندا وقۋشىلار بالا قۇقىقتارى مەن توتەنشە جاعدايلارداعى مىنەز-قۇلىق ەرەجەلەرى جونىندەگى بىلىمدەرىن كورسەتتى. ولار زاڭدى جانە زاڭسىز ارەكەتتەردى سەنىمدى تۇردە اجىراتىپ، بايقاعىشتىق، ساقتىق جانە ءقاۋىپتى جاعدايدا ارەكەت ەتۋ قابىلەتتەرىن كورسەتتى. سونىمەن قاتار، بالالار قارىم-قاتىناس جاساۋ داعدىلارى مەن كومەككە جۇگىنۋ الگوريتمىن جاقسى مەڭگەرگەندەرىن دالەلدەدى.
كورەرمەندەر وقۋشىلاردىڭ ازاماتتىق ۇستانىمى قالىپتاسقانىن جانە اينالاسىنداعىلاردىڭ قاۋىپسىزدىگىنە جاۋاپكەرشىلىكپەن قارايتىنىن اتاپ ءوتتى.
كوماندالىق جۇمىس، مارشرۋتتىق پاراقتار، ويىن تاپسىرمالارى جانە جاس ازاماتتىڭ انتى ءىس-شارانى بارلىق قاتىسۋشىلار ءۇشىن پايدالى عانا ەمەس، ناعىز قىزىقتى ءارى اسەرلى ەتتى.
— «بارلىق كوماندالار سەرتيفيكاتتارمەن ماراپاتتالدى، ال ەڭ بەلسەندى قاتىسۋشىلارعا گراموتالار مەن كۋبوكتار تابىستالدى. كۆەستتى ۇيىمداستىرۋ مەن وتكىزۋگە مۇعالىمدەر مەن ۆوجاتىيلار ۇلكەن ۇلەس قوستى»، — دەدى №70 مەكتەپ ديرەكتورى زاۋرەش بەيسەمبايەۆا. — «وسىنداي ءىس-شارالار بالالاردا ءقاۋىپسىز مىنەز-قۇلىق مادەنيەتىن جانە قۇقىقتىق ساۋاتتىلىقتى قالىپتاستىرۋعا ىقپال ەتەدى».
قۇقىق ءتارتىبىن قامتاماسىز ەتۋ ءۇشىن مەكتەپ بوستاندىق اۋدانى پوليسيا باسقارماسىنىڭ قىزمەتكەرلەرىمەن تىعىز جۇمىس ىستەيدى. ولاردىڭ باستاماسىمەن «جاس ساقشى» جاساعى قۇرىلعان بولاتىن. وقۋ جىلى بويى يۋۆەنالدى پوليسيا جاساق مۇشەلەرىمەن عانا ەمەس، باستاۋىش سىنىپ وقۋشىلارىمەن دە پروفيلاكتيكالىق اڭگىمەلەر جۇرگىزىپ وتىردى. بالالارعا ساباقتان قالماۋ، كەشىكپەۋ، مەكتەپ ءتارتىبىن ساقتاۋ، ءقاۋىپتى زاتتار اكەلمەۋ، مەكتەپ مۇلكىنە ۇقىپتى قاراۋ جانە مۇعالىمدەر مەن وقۋشىلارعا قۇرمەتپەن قاراۋ ۇيرەتىلەدى. پوليسيا فورماسىن كيۋدىڭ ءوزى بالالارعا ەرەكشە جاۋاپكەرشىلىك جۇكتەيدى.
— «ءار مەكتەپتىڭ پەداگوگيكالىق ۇجىمىنىڭ باستى مىندەتى – ءاربىر بالانىڭ قاۋىپسىزدىگىن قامتاماسىز ەتۋ. ول ءۇشىن كەشەندى ءتاسىل قاجەت. الماتى قالاسىنىڭ ءبىلىم باسقارماسى مەگاپوليستەگى بارلىق مەكتەپتەردى كۇزەتپەن، تۋرنيكەتتەرمەن جانە بەينەباقىلاۋ كامەرالارىمەن قامتاماسىز ەتتى. سونداي-اق وقۋشىلارمەن جانە ولاردىڭ اتا-انالارىمەن جۇيەلى جۇمىس جۇرگىزىلۋدە»، — دەپ اتاپ ءوتتى بوستاندىق اۋدانىنىڭ ءبىلىم ءبولىمىنىڭ باسشىسى ايگۇل قاسىمبەك. — «مەكتەپتەردە ءقاۋىپسىز ورتا قالىپتاستىرۋ ماقساتىندا ءتۇرلى جاعدايلارداعى مىنەز-قۇلىق ەرەجەلەرىن ۇيرەتەتىن سىنىپ ساعاتتارى وتكىزىلەدى. جالپى مەكتەپتىك اتا-انالار جينالىستارىندا وتباسىندا، مەكتەپتە، اۋلادا جانە قوعامدا قاۋىپسىزدىك مادەنيەتىن تاربيەلەۋ بويىنشا ۇسىنىستار بەرىلەدى. اتا-انالار بالاسىنىڭ كىممەن دوس ەكەنىن، قالاي جۇرەتىنىن، قايدا باراتىنىن، نە الىپ جۇرەتىنىن جانە مىنەز-قۇلقىندا قانداي دا ءبىر وزگەرىستەر بار-جوعىن ءبىلۋى ءتيىس».