الماتىدا ەكپە العاندار سانى بويىنشا ناۋرىزباي اۋدانى كوش باستاپ تۇر

مەگاپوليستە ۆاكسيناسيالانعانداردىڭ سانى 1 ملن ادامنان استى

باقىتجان ساعىنتايەۆ مەگاپوليس اۋداندارى اراسىندا ۆاكسيناسيا بويىنشا اۋتسايدەرلەر مەن كوشباسشىلاردى اتادى، دەپ حابارلايدى Almaty-akshamy.kz

الماتى وڭىرلەر بويىنشا حالىقتى پروفيلاكتيكالىق يممۋنداۋ قارقىنى بويىنشا بۇرىنعىسىنشا كوش باستاپ تۇر. مەگاپوليستە 1 005 496 ادام ءوز دەنساۋلىعىن جانە اينالاسىنداعىلاردىڭ دەنساۋلىعىن قورعاۋعا قامقورلىق جاسادى، 955 410 ادام ۆاكسيناسيانىڭ تولىق كۋرسىنان ءوتتى. مەگاپوليس اكىمى باقىتجان ساعىنتايەۆ Akimat LIVE باعدارلاماسى ارقىلى قالالىقتارمەن تىكەلەي ترانسلياسيا بارىسىندا وڭىرلەر بويىنشا حالىقتى ۆاكسيناسيالاۋ قارقىنى تۋرالى ايتىپ بەردى.

«بۇگىنگى تاڭدا ميلليوننان استام الماتىلىق ۆاكسينا الدى، بۇل ۆاكسيناسيالاۋعا جاتاتىن حالىقتىڭ جالپى سانىنىڭ 76،5% - ىن قۇرايدى. اۋەزوۆ جانە بوستاندىق اۋداندارى ارتتا قالىپ كەلەدى. ناۋرىزباي اۋدانى تولىقتاي دەرلىك اياقتادى، بۇگىندە بۇل كورسەتكىش 95 پايىزعا جەتتى. الاتاۋ اۋدانىندا 81،7 %، مەدەۋ، تۇركسىب جانە المالى اۋداندارىندا جاقسى قارقىنمەن كەلەدى»، – دەدى اكىم.

مەگاپوليس باسشىسى سونداي-اق الماتىدا ريەۆاكسيناسيا ناۋقانى 20 قاراشادا باستالاتىنىن اتاپ ءوتتى.

«بىزدە ريەۆاكسيناسيا باستالماق، ال كوبىسى ءالى ءبىرىنشىسىن العان جوق.   حالىق ساناعى اياقتالدى، ءىس جۇزىندە بىزدە 2 ميلليوننان استام ادام بار، ياعني بىزدە ۆاكسياناسيالانعان ميلليون تۇرعىن بار ەكەنىن ەسكەرسەك، ۇجىمدىق يممۋنيتەت 50% شەگىنە جەتكەن جوق. مامانداردىڭ ۇسىنىسى بويىنشا، بارىنشا ءتيىمدى بولۋ ءۇشىن ءبىز حالىقتىڭ 80% – ىن ۆاكسيناسيالاۋىمىز كەرەك»، - دەپ اتاپ ءوتتى اكىم.