تىلىكسىز جاڭا قاقپاقشا: الماتىدا اۋىر جۇرەك اۋرۋىمەن اۋىراتىن ءۇش ناۋقاس قۇتقارىلدى
الماتى قالالىق كارديولوگيالىق ورتالىقتا 3 ترانسكاتەتەرلىك اورتالىق قاقپاقشا يمپلانتاسياسى (TAVI) ءساتتى ورىندالدى، - دەپ حابارلايدى Aqshamnews.kz.
مۇنداي وتا - اۋىر اورتالىق ستەنوزدى ەمدەۋدىڭ زاماناۋي ءادىسى. ول قاقپاقشانى كوكىرەك قۋىسىن اشپاي جانە جۇرەكتى توقتاتپاي تامىر ارقىلى اۋىستىرۋعا مۇمكىندىك بەرەدى.
وتانى ينتەرۆەنسيالىق كارديولوگيا ءبولىمىنىڭ مەڭگەرۋشىسى ورازبەك ساحوۆ استانا قالاسىنداعى UMC جۇرەك ورتالىعىنىڭ جەتەكشى مامانى، پروكتور ابدۋراشيد مۋسايەۆپەن بىرلەسىپ جاسادى.
ەرەكشە كلينيكالىق جاعداي ناۋقاس ايەلدە بايقالدى: وعان بىرنەشە جىل بۇرىن ميترالدى قاقپاقشانى پروتەزدەۋ وتاسى جاسالعان بولاتىن. ۋاقىت وتە كەلە ورناتىلعان قاقپاقشا دۇرىس جۇمىس ىستەمەي قالعاندىقتان، قايتالاما ارالاسۋ قاجەتتىگى تۋىندادى. الايدا جۇرەككە جاسالاتىن قايتالاما اشىق وتا ءاردايىم ءتىننىڭ تىرتىقتى وزگەرىسىنە جانە زور قان كەتۋ قاۋپىنە بايلانىستى جوعارى قاۋىپپەن وتەدى. دارىگەرلەر قاقپاقشانى TAVI ادىسىمەن اۋىستىرۋ تۋرالى شەشىم قابىلداپ، جۇرەككە جاراقاتتاۋشى قولجەتىمدىكتەن جانە جالپى ناركوزدان باس تارتۋعا مۇمكىندىك الدى. ناۋقاس بىرنەشە كۇننەن كەيىن-اق ۇيىنە شىعارىلدى.
تاعى ەكى ناۋقاستا اورتالىق قاقپاقشانىڭ اۋزى 2-3 سم² قالىپتى كورسەتكىشتىڭ ورنىنا 0،4 سم²-گە دەيىن تارىلعان اسا ءقاۋىپتى اورتالىق ستەنوز انىقتالدى. مۇنداي جاعداي اۋىر ەنتىگۋگە، السىزدىككە جانە فيزيكالىق بەلسەندىكتىڭ كۇرت شەكتەلۋىنە اكەلدى. ەكى جاعدايدا دا تامىر ارقىلى قاقپاقشا ايماعىنا پروتەز جەتكىزىلىپ، ول اشىلىپ، قالىپتى قان اينالىمىن قالپىنا كەلتىردى. وتالار اسقىنۋسىز ءوتتى.
TAVI-وتاسى - قازىرگى كارديوحيرۋرگياداعى ماڭىزدى باعىتتىڭ ءبىرى. ونىڭ باستى ارتىقشىلىعى - جاراقاتتىڭ ازدىعى، قالپىنا كەلۋ مەرزىمىنىڭ قىسقارۋى جانە جوعارى قاۋىپكە بايلانىستى اشىق وتا جاساۋعا بولمايتىن ناۋقاستارعا كومەك كورسەتۋ مۇمكىندىگى.