ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىندا مەملەكەتتىك ەمتيحاندار باستالدى.
تۇلەكتەردىڭ ءبىلىمى مەن داعدىلارىن وبەكتيۆتى، جان-جاقتى باعالاۋ، ولاردىڭ قىزمەت اتقارۋعا دايىندىعىن تەكسەرۋ ءۇشىن ينستيتۋتقا ق ر قورعانىس مينيسترلىگىنەن كوميسسيا كەلدى، دەپ حابارلايدى aqshamnews.kz.
ەمتيحان سەسسياسى «ءالي» وقۋ ورتالىعىنداعى ساپتىق بايقاۋدان باستالدى. سىمداي تىزىلگەن كۋرسانتتار الداعى كۇردەلى سىناقتارعا دايىن ەكەندىكتەرىن كورسەتتى.
– ەلىمىزدىڭ قورعانىس قابىلەتى جاس وفيسەرلەردى وقىتۋ ساپاسىنا بايلانىستى. ولار – ارميامىزدىڭ بولاشاعى. تۇلەكتەر مۇقيات دايىندىقتان ءوتتى. ەندى ءوز بىلىمدەرىن راستايتىنىنا جانە قويىلعان مىندەتتەردى لايىقتى ورىندايتىنىنا سەنىمدىمىن، – دەدى ينستيتۋت باستىعى گەنەرال-مايور باۋىرجان يباتۋلين.
سىناق بارىسىندا تەوريالىق ءبىلىم، پراكتيكالىق داعدىلار، تاكتيكالىق ويلاۋ دەڭگەيى جانە تۇلەكتەردىڭ ۇرىسقا بارىنشا جاقىن جاعدايلاردا سالماقتى شەشىم قابىلداۋ قابىلەتى باعالانادى.
اتتەستاتتاۋ اياقتالعاننان كەيىن ديپلومدى ماماندار «لەيتەنانت» العاشقى وفيسەرلىك اتاعىن الىپ، قارۋلى كۇشتەر قاتارىندا قىزمەتىن جالعاستىرادى.