جامبىل وبلىسىنىڭ اكىمى ەربول قاراشوكەيەۆتىڭ توراعالىعىمەن وتكەن اپپاراتتىق كەڭەستە 2025 جىلدىڭ ءبىرىنشى جارتىجىلدىعىنداعى جۇمىسپەن قامتۋ جانە اتاۋلى الەۋمەتتىك كومەك كورسەتۋ بارىسى سارالاندى.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەركىن كەلەسوۆتىڭ ايتۋىنشا، بيىل وبلىستا 65 647 جۇمىس ورنىن اشۋ جوسپارلانسا، 1 شىلدەگە دەيىن 25 918 ادام ەڭبەكپەن قامتىلعان. جۇمىسپەن قامتۋدىڭ بەلسەندى شارالارىنا 28 912 ادام تارتىلعان.
سۋبسيديالاناتىن جۇمىس ورىندارىنا 22 753 ادام جولدانىپ، ونىڭ 8 330-ى تۇراقتى جۇمىسقا ورنالاسقان. مەملەكەت باسشىسىنىڭ تاپسىرماسىنا سايكەس وڭىردە 2 222 جاڭا جۇمىس ورنى اشىلدى. جىل سوڭىنا دەيىن تاعى 10 مىڭنان استام جۇمىس ورنىن قۇرۋ جوسپارلانۋدا.
سونىمەن قاتار:
-
98 جوبا ەلەكتروندى ەڭبەك بيرجاسىنا ەنگىزىلىپ، 442 ادام جۇمىسقا ورنالاسقان؛
-
579 ادام قىسقا مەرزىمدى كاسىپتىك وقۋعا تارتىلعان (جوسپار – 1 315 ادام)؛
-
501 ادامعا قايتارىمسىز گرانت بەرىلگەن (ونىڭ ىشىندە كوپبالالى انالار، مۇمكىندىگى شەكتەۋلى ازاماتتار، مۇگەدەك بالا تاربيەلەۋشىلەر بار).
ااك 3 408 وتباسىنداعى 18 705 ادامعا تاعايىندالعان. بۇل وتكەن جىلمەن سالىستىرعاندا 8 933 ادامعا از. سونداي-اق 5 848 بالاعا اي سايىنعى تولەمدەر جۇرگىزىلگەن. الايدا زەردەلەۋ كەزىندە 96 وتباسىعا كومەك زاڭسىز بەرىلگەنى انىقتالعان.
وبلىس اكىمى ەڭبەككە قابىلەتتى ازاماتتاردى جۇمىسپەن قامتۋ، جاستاردى تۇراقتى جۇمىسقا ورنالاستىرۋ، كاسىپكەرلىكتى دامىتۋ مەن الەۋمەتتىك كومەكتى ءادىل تاعايىنداۋدىڭ ماڭىزىن اتاپ ءوتتى. ول قوعامدىق جۇمىستار كۆوتاسىن ارتتىرۋدى، قايتارىمسىز گرانتتاردىڭ ءتيىمدى پايدالانىلۋىن باقىلاۋدى جانە ااك تاعايىنداۋعا جاۋاپتى مامانداردى وقىتۋدى تاپسىردى.